PONGAOPEIYU 19
19
1Haithaisü rakivanou maisou alaovei pai-rao büyu kho alinou haibüa paoyu Enou choue, “Hallelujah! Khailu peiyu, adusho alia khoukosü Eletao Ramai veie! 2Daiolouzü puhvei chikuyu sü cheche-e ea kaozüe! Deiphaoye puhvei khulou souyu vah sünanou souhao-soushi peiyu khakhapfü adupainaye sü puhnou chikupeire. Ramai nou puhvei kilaitao zhe khühsü puh hinou phouloure.” 3Süshoa puletao nou shapukhaie, “Hallelujah! Dushoyu nuhdu sünaye meidei-a buyu sühinou meikhaosu teisa nou khaopawe!” 4Tsümai kaidaitao ea hrikhaona adaitao nou kou kaoloua vebuh hinou chobua buyu Ramaiye sü tholoua paoe, “Amen! Hallelujah!”
Zhaotu Sheenghiyu vei Tovai
5Sükisü vebuh süna hinou pai alinou haibüa shapae, “He Ramaiye pi-a hrüyu maikhemai tai-du ea puh kilai khemai hrülai, Eletao vei Ramaiye sholo!” 6Süthaisü Enou maisou alaovei pai kuyu, dzüdu kho kuyu ea chihshoyu teisüyu kho kuyu pailinou haibüa paoyu choue, “Hallelujah! Daiolouzü Mapao, Eletao vei khoukhoulai Ramai nou Veo souloure! 7Eletao lesaloua sathailou laikhe ea puhvei adushosü paosho laikhe! Daiolouzü Zhaotu sünavei sheere teilesü veloure, alia puhki verepainou lah puhye donou souda chere. 8Alia puhye panou veithou peivavayu ea sheetouyu jüyu sahnou bahnou loure donou süsü puh hi peire.” (Daiolouzü veishoyu jüyu sah sünasü sheeyu maitao vei cheche vahtaoe.)
9Alia rakivamai sünanou Ahi paoe, “Haisü rüthoukhaio: Zhaotu sünavei sheenghiyu tovaihi vere kulouyu puletaosü rako veie.” Alia puhnou paopukhaie, “Haitaosü Ramai vei cheche chipaotaoe.” 10Sühinou Esü puhye tholoure donou puhphi hinou kou kaoloure. Ana puhnou Ahi paopeie, “Nenou, haibüa souwu laimoe! E-a neye ea Jisu vei zhopaoh soua buyu ne thaihou jürai maitaoye koa kilai souyu maibaie. Ramaiye tholo!” Daiolouzü Jisu vei zhopaoh sünawo louzü rachi paola payu vei rako sünasüe.
Rhei Kaana Pfülaiyuna
11Süthaisü Enou rakisü houpa khaitoua ngaoe, alia zhukhaio, sühisü rhei kaali bue. Rhei sünaye pfüa laiyu puh zhihsü Louchelou-aveio ea Checheo tea kuwe. Acheche hinou puhnou chikuwe ea reih züwe. 12Puh nghithousü meikei büe, alia puh peiva hisü vepeirü taoli rüpfüe. Puhva hisü puhlah deinou kukhe mainou sükhaimoyu zhih ali rüpfülaie. 13Puhsü zhe hinou pothou sücha khaitouyu zaoduna ali nouwe, alia puh zhihsü “Ramai Chipao” touwe. 14Rakiva reihmai taosü sheetouyu ea kaavavayu jüyu sahnou bahnoua rhei kaatao vahinou puhthaisü füa laiwe. 15Puhmü hinou haivei shoyu khocheli pawe ea sünanou poa puhnou tahrüh khemaitaoye sü koloulai. Puhnou puletaoye sü hu sü danou poa tukha-sahrülai, alia puhnou khoukhoulai Ramai vei rarou shoyu darkhadzü sühyu buh sü tailai. 16Puhvei zaoduna vahi ea puhvei dekeh vahisü “Vemaitao pei Veo ea paopumaitao pei Mapao” touyu zhihsü rüthou khaitoue.
17Süthaisü Enou rakivamai aliye teinghi vanou la-a buyu ngaoe. Alia puhnou ratei tsüle hinou zhaosühao-a buyu raohou taohi haibüa pai kushoa paoe: “Tavelo ea Ramai vei tovai aduna donou ve dzülo! 18Tavelo ea vemaitao vei vasou, reihmai peichamai ea reihmaitao vei vasou, rheitao ea sütao vahi buyu maitao vei vasou, mado soua hrüyumai ea qila maitao vei vasou ea maikhemai taidu hrülaivei vasousü ve touloukhaio!”
19Alia khaosou süna, deiphao hi vemaitao ea puletao vei reihmaitao nou rhei sünaye pfüa laiyu ea puhvei reihmaitao pei hi reih züloure donou vedzüa buyu sü Enou ngaoe. 20Ana khaosou sünaye sü ea puhye koa puh nghojünou shee taoli soua laiyu madayu rachi paolapeioye niloure. Shee sütaonou khaosou sünavei paoshee buyutao ea puhvei zhu raiyu basharaye thoyutaoye lawure. Khaosou süna ea madayu rachi paolawo puhaiye sü meichuhnou dei-a buyu meizai sünahi hria polai thoure. 21Alia puhaivei reihmaitaoye sü rhei pfüyuna mü hinou payu khoche sünanou daothea khaire; alia raohou veishinou puletao vei vasousü toulousü touloua pou phoutsü loure.
Currently Selected:
PONGAOPEIYU 19: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
