PONGAOPEIYU 16
16
Ramai vei Rarouyu Paitao
1Süthaisü Rathoki hinou kushoyu pai alinou rakivamai anaitao hi haibüa paoyu sü Enou choue: “Neletao taloua Ramai vei rarouyu pai anaitaosü deiphao hi lakoukhaio!”
2Südonou rakivamai araina nou taloua puh vei paisü deiphao lakoure, alia khaosou süna vei shee buyu ea puhvei zhu raiyu basharaye thoyu maikhe maitao vahisü ngaopiyu ea soushoyu chükütao paloure.
3Süthaisü rakivamai ahai chenanou puh paisü zai hi lathoue. Sühinou zai dzü sü thaimai vei zhe büloure, alia zai hi buyu hrikhaona hrülai sü thaire.
4Süthaisü rakivamai asü chenanou puhvei paisü, reitao ea dzühoungtao hi lathoue, alia sütaosü zhe datare. 5Sühinou dzütao pei hi khoyu rakivamai sünanou haibüa paoyu sü Enou choue, Oh Chuchu buyu ea raikinou buyu masheeo, nenou chiku kouyu haitao sü kaozüe! 6Daiolouzü puletao nou nevei sheeyu maitao ea rachi paolamai taovei zhesü soupare, alia südonou nenou puletao hisü zhe küloure donou peire. Haisü puletao nou ngaozüe! 7Sühinou sheelabuh hinou pai alinou haibüa paoyu sü Enou choue, “Ovai Khoukhoulai Ramai Mapao nevei chikuyu taosü chechewe ea kaozüe!”
8Süthaisü rakivamai adai chenanou puh paisü teinghi hi lakhaire, alia sünaye panou maikhe maiye puhvei meisounou chathyayu sü aetou peire. 9Puletaoye sü soushoyu meisounou chapeire, alia veahoyu haitao pei hi khouko buyu Ramai puh zhihsü puletao nou paoshi paokha peire, alia puletao nou le daloua puhvei dushosü paosho peibae.
10Süthaisü rakivamai angou chenanou puhvei paisü khaosou sünavei vebuh vahi lakhaire. Sühinou khaosou sünavei vebuh sü maitei loure, alia maikhe mainou soushoyu donou puletao vei malisü tutsütsü loure. 11Sübüa puletao vei souyu ea chükü paopayu sütao donou puletao nou rakibu Ramaiye chaloure. Ana puletao vei ashi vah hinou puletao lesü daloubae.
12Süthaisü rakivamai arou chenanou puh paisü Euphratis reidu nahi lakouthoue. Sühinou teinghi palovanou veyu vemaitao vei ludu souda loure donou reidzü süsü there. 13Süthaisü Enou vaokü zhu raiyu sheemoyu rako asü ngaoe. Sütaosü zai nghouduna, khaosouna ea madayu rachipaola maina mü hinou pae 14Sütaosü khupa vah soua laiyu rashitaovei rakotaoe. Rako asü hai taonou deiphao hi vemaitao hrülai hi Khoukhoulai Ramai vei teithe Adunaki reih süna donou puletaoye pove dzüloure tapare.
15“Zhukhaio! Ewo avaomai ali büa vewe! Maitalinou baitoua talou more ea maiye panou puhvei ahrao buh sü ngaolou more donou zhaihe poa ea puhvei sabanühsü tupoa buyu puhsü rakoveie!”
16Süthaisü rako sütaonou vemai sütao ye Ebria la hinou Armageddon touyu buh sünahi save dzüloure.
17Süthaisü rakivamai anai chenanou puh paisü teikhai hi lakhaire. Alia Rathoki hi vebuh süna hinou kushoyu pai alinou paipaloua haibüa paoe, “Haisü souloure!” 18Alia sühisü teipei vavayu, pairaotao, tei süyu pai, alia nü süshisho loure. Emaiye soushu rainou haibüa nüsüyu hai pakhai mohie; hainanou kukhe teitei jünou shikae! 19Dushoyu nuhdu nasü zhasüsoua soukhore, alia tahrüh khemaitao teiteivei nuhdu taosü souhare. Alia Ramai nou dushoyu Babilon ye sü licholoua puhye panou puhvei lekha-rarouyu zhaohnou phoupfüa buyu pai nasü küloure. 20Zaipeidei veishisü ngaokhai more ea deichi veishisü hazheih tare. 21Rateivanou maikhemai pei hisü reithou alilinou sühcho raingoupha süyu dushoyu reithoutao rükou loure. Alia reithou vanou veahoyu süna donou maikhemai nou Ramaiye chaloure, daiolouzü veahoyu süsü ngaopi zhulere.
Currently Selected:
PONGAOPEIYU 16: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
