PONGAOPEIYU 15
15
Rakivamai Anai ea Veahoyu Anaitao
1Süthaisü kukhe dushoyu ea khupa shoyu sheeli süolouzü veahoyu anai poa buyu rakivamai anaitaoye sü rakivanou Enou ngaoe. Sütaosü veahoyu akhai taoe, daiolouzü sütaosü akhaisoua Ramai rarouyu pongaoyu taoe.
2Sükisü Enou meinou hükhai touyu zhuzhu kuyu zai ali ngaoe. Alia khaosou süna ea sünavei zhu raiyu bashara sünaye, alia puh zhihvei chahpei sünaye kolouyu maitaoye-a ngaoe. Puletao sü Ramai nou puletao hi peikhai touyu lanabvü aduna sütao poa zhuzhu kuyu zai süna pehinou la-a bue, 3alia puletao sü Ramai kilai Moses vei lou ea Zhaotu süna vei lousü soua bue:
“Khoukhoulai Ramai Mapao,
nevei vahtaosü daizhozhou dusa ea khupasa!
Oh tahrüh khemaitaopei Veo,
nevei ludutaosü daizhohou kaozüsa ea chechesa!
4Oh Mapao, thaohnou neye pimolai?
Nezhih dushosü thaohnou paosho balai?
Daiolouzü ne likhei mashee baie.
Tahrüh khemai hrülainou taveloua neye tholai,
daiolouzü nevei cheche vahtaosü mai hrülai nou ngaokhai loure.”
5Haithaisü Enou raki hinou Ratho kisü houpa khaitoua sühisü zhopaohvei sahpaona bua ngaoe. 6Rathoki süna hinou veahoyu anai poa buyu rakivamai anai taosü tapae. Puletao sü sheetoua peivavayu jüyu sahnou bahnoue ea puletao khaohisü sana khyakho nou phusühao khaitoue. 7Sükisü hrikhaona adai hrohinou alinou teisa nou hria buyu Ramai vei rarou nou phoutsü poa buyu sana pai anaitao sü popa rakivamai anaitao hi peie. 8Alia Rathoki süsü Ramai vei khouko ava ea puhvei khouko hinou khaopayu meikhao sünanou phoutsü loure, alia rakivamai anaitao nou poveyu veahoyu anaitao pache loumo koute sü maitalia Rathoki süna hi taloulou hore.
Currently Selected:
PONGAOPEIYU 15: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
