LOUTAO 91
91
Etaoye Vupa-apeio Ramai
1Kukulaio hi velou bulouyu maitao,
Khoukhoulaiwo vei shouh khe hinou baibu soua bulouyu maitao,
2 Mapao hi hai büa paolai,
“Ne hai Eye vupa-a peio ae kho-apeio nasüe,
Ne sü avei Ramai-e, Enou neye louchewe.”
3Puhnou neye kaozhou ashi daore hinou ae thailou veiyu sounou ashi hinou vupa peilai.
4Puhnou neye puhvei shouh nou hopeilai;
puhnou neye kiko peilai;
puhvei chilee checheyu sünou neye khopeilai ae vupa peilai.
5Nenou khei teile hi kaozhou ashi daore donou ngaopi laimoe,
moyuma heaki mai ashi mainou dure donou pilai moe
6moyuma teizhi hinou sounou ashi vere,
moa hea teile hi mainou southare khesü ngaopi laimoe.
7Ne pehao hinou mai theli kaodu tayuma,
moa ne nghiki nou mai thekirou thaitayuma,
neye sü hatara linoua soushi louhoe.
8Mai ashi maiye kabüa tudee peiwe touyu khesü nenou zhulouzü ngaoloulai.
9Nenou Mapao ye sü nevei baibu souloure,
ae Kukulai hi Abuwo nasü nevei kho-apeio sü souloure,
10südonou kaozhou ashi nasü neye ve dailou hoe,
ae taidayu nasü ne nghiki velou hoe.
11Nenou buh tarali hi veyuma Ramai nou rakiva maiye panou neye khosa-a tapeilai.
12Neye panou phi sülou more donou puhnou neye puh bah nou süthaisa-a laipeilai.
13Nenou soukhaoveo ae nghou khesü phi nou taidei poa taloulai.
14Ramai nou paoe, “Eye leshiyu maiye sü Enou khailupa peilai,
ae Eye Mapao-e tea süa buyu maiye Enou vupa peilai.
15Puletao nou Eye kuyu phaki, Enou chila peilai;
puletao nou veahoa buyu phaki, Enou puletaoye sü kozho peilai.
Enou puletaoye sü vupa peilai ae tsükhou peilai.
16Enou puletaoye hrü shoyu nasü peilai;
Enou puletaoye sü khailupa peilai.”
Currently Selected:
LOUTAO 91: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
