LOUTAO 90
90
LARÜBVÜ ADAINA
(Lou 90—106)
Ramai ae Mai
1Oh Mapaowo, nenou Etaoye panou baichao loure ki nasü teisa nou soupeie.
2Deichitao soupei mojü nou moa teideiphao soushumo jünou ne hai akhai hayu Ramai-e,
ae haithai-a teisa nou bure Ramai sü ne baie.
3Nenou maiye sü puhnou veyu buh hi soudakhai thoupeie;
nenou puhye sü nai hi soudakhai thoupeie.
4Ne hiolouzü po theli hai teithe ali bütoua baie;
süna hai latayu do teithe raibütoua baie,
kheikou teile jütouli bütoua baie.
5Nenou Emaiye sü dzüdu nou dupoa tayu büa phaipoa tare,
Emaitou hai zhiho mekou bütoua baie.
Shona paopayu poubetou ali bütoua baie,
6süna hai vipaloua heakou poupa pahpaloue,
süthaisü koukhe loukhaie kiveta-a thaita baiwe.
7Nevei lekha sünou Etaoye sü soushiwure,
ne vei rarou sünou Etaoye khuh soupa peiwure.
8Etao vei mahmo khesü nenou nevei nghoujü hi khaitoue,
ae Etao nou kheikhei soua mah soukhai touyu khesü nenou nevei nghingao hi khaikhaitoue.
9Etao vei hrümamai hai nevei lekha sünou soujü khai peiwure,
Etao vei po teile hai kheikhei soua pai raoyu büa hatare.
10Etao vei hrütou hai po rainai baie—
hakinou pfüphao vei-a bulouzü po raicha sü baie;
ana sütao hia veahoyu ae tateishoa hrüyu khaikho baie;
hrümamai hai thasho nou hata-a baiwe, ae Etao hai sübüa ta-a baiwe.
11Nevei lekha sü khouko kazhou bue touyu sü thaonou süwe?
Nevei rarou nasü ngaopiyu kazhou pove peilai touyu sü thaonou süge?
12Etao vei hrütou hai jüsho baie,
südonou kabüa tsüveia hrüloulai touyu nasü Etao hi doupeio.
13Nevei lekha rarou nasü teile kasho bukou laige?
Oh Ramai, nevei kilai Etaoye zhuvea peio.
14Teithetsü nevei tobai soumoa leshi peiyu nasü Etao hi peio,
sükulouzü Etao vei hrümamai veishi hai lesa-a neye lou sousholai.
15Etao nou po teile haitao hi veahoyu
ae leveayu thaosü chunou Etao hi savayu nasü peio.
16Nevei kilai maitao hi nevei vah haso khesü soungao peio,
ae Etao vei tyaosholea hi nevei khouko ava nasü ngaopeio.
17Etao Ramai Mapaowo, nevei ha nasü Etao hi peio.
Etao nou soupfüyu veishi hai panou veilouyu sü soupeio!
Currently Selected:
LOUTAO 90: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
