LOUTAO 92
92
Paoshoyu lou
1Oh Mapaowo, ne hi kalo paoyu hai daizhou koute veisa,
nevei zhih aveih nasü lou soushoyu hai dai zhou kou te savasa,
Oh Kukulai hi buyu Ramai,
2nevei tobai soumoa leshi pei nasü teithetsü shapaoyu hai,
ae nevei chilee checheyu nasü kheitsü shapaoyu hai daizhou koute veisa,
3poa lou souyu basei nou koa kho veishoa neye lou soushoyu hai daizhou koute vei sarou!
4Oh Mapaowo, nevei vah haso sünou Eye sousa vapei;
nenou soupfü khaitouyu vahtao donou E asa-a lou souwe.
5 Mapao, nevei vah haso khesü daizhou koute dusa!
Nenou tsüchoyu khesü daizhou koute thousarou!
6Hai khesü avomai nou sülou hoe;
tsü chemoyu maitao nou sükulou hoe;
7mai ashi mainou poube paopayu büa paopa malae;
vah ashi souyu maitao nou duso-a bua malae;
ana puletaoye sü souhakhai-a bailai,
8daiolouzü Mapao hai kukulai hinou teisa puhnou khosa-a hrülai.
9Etao nou süwe sülouzü neye ngaobayu maitao hai thaita-a bailai,
ae mai ashi maitao hai hakata-a bailai.
10Nenou Eye sü rekou chode ali büa soukhouchi peie;
nenou Eye savayu shiha sü peie.
11Eye ngaobayu maitao nou hakatayu sü Enou ngaore,
ae mai ashi maitao nou kra-a buyu pai sü Enou choure.
12Acheche mai hai habe büa duso palai;
puletao hai Lebanon hi sedar süübe büa vipalai.
13Puletao hai Mapao vei ki hinou shokhai touyu süübe ali bülai,
Etao Ramai vei Rathoki hinou duso palai,
14tsülouyu thai-a rashithou alao shipeiyu bülai,
ae teisa nou daiva-a nou khouchi-a bukoulai.
15Haibüa soupeiyu donou Mapao hai cheche-e touyu sü ngaowe,
puhnou Eye kho-apeio nasüe ae puh hi cheche moyu aliro hae.
Currently Selected:
LOUTAO 92: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
