LOUTAO 89
89
Veahoyu phaki Lou Souyu
1Oh Mapaowo, nevei tobai
soumoa leshi peiyu nasü Enou teisa nou lou soulai;
nevei chilee checheyu nasü Enou teisa nou shapaolai.
2Nevei leshiyu hai teisa nou bua bailai,
ae nevei chilee checheyu nasü ratei büa bukou telai touyu Enou süwe.
3Nenou paoe, “Enou dolouyu maitaoye koa vo ali soukhai toue,
ae avei kilai David hai Enou haibüa chaachou soupei khaitoue.
4Enou nevei tyaosholea taoye panou
vere khaphao teitei hi veo sü soukou telai;
Enou nevei tyaosholea taoye sü teisa donou soushu peilai.”
5Oh Mapaowo, nenou khupayu vah soupeikhai touyu khesü rakiva mainou lou soushowe;
sheeyu maitao nou nevei chilee checheyu nasü lou soushowe.
6Rakivamai ali-a neye raiyu ha-e, Mapao;
rakivamai ali koute-a neye deiyu hae.
7Sheeyu maitao nou tave jüa buyu buh hisünou neye ngaopi-a bue;
ae puletao mai hrülai nou neye khuhao-a nou lapoa bue.
8Khoukhoulai Ramai Mapao, neye büa khouko buyu mailia ha-e;
ha teitei hinou ne hai chilee cheche-e.
9Nenou khouko bushoyu zaidu pei hia khowe,
ae zhaipou shishoa dzü khüpayu hai-a soukaona peilou baie.
10Nenou maitouyu Rahab soukhaona nasü southa peie;
nevei khouko sünou neye ngaobayu maitaoye sü soukanghi peie.
11Raki ae deiphao sü nevei baie,
nenou teideiphao ae sühi na veishi sü soupeie.
12Nenou teibe ae teizü sü soupeie,
Tabor ae Hermon Deichi sünou asasho poa neye lou soushowe.
13Ne hai daizhou koute khouko busa!
Nevei pfüchi hai daizhou koute duso sarou!
14Nevei vedei nasü acheche ae kaozü hinou soushu khaitoue;
nenou soupfüyu vah teitei hai leshiyu ae chilee checheyu hinou soungao peie.
15Oh Mapaowo, neye lou soupoa thoyu maitao
ae nevei zhuvea hinou hrüa buyu maitao hai daizhou koute savayu maitaosa!
16Puletao hai ne vanou lesa shoa teisa nou bua baiwe,
ae nevei aveih khesü puletao nou paoshowe.
17Nenou Etaoye veilou ngalouyu nasü peie,
nevei leshiyu sünou nenou Etaoye kolouyu nasü peie.
18Oh Mapaowo, nenou Etaoye vupa-apeio nasü dopa peie;
Israel maivei sheeyu Ramai, nenou Etaoye sü veo ali peie.
Ramai nou David hi Apaopeiyu
19Daoh raichoki nenou louchelou veiyu nevei kilai hi zho kounou haibüa paoe:
“Enou khouko bushoyu reihmai aliye soukha peie;
Enou maikhe mai hrohinou dopa louyu mai aliye vebuh sü peie.
20Enou avei kilai David ye sheeyu theadzü sünou pa veo soure donou napeie.
21Avei pfüchi nasü teisa nou puh hi bulai,
avei khouko sünou puhye sü soukhouchi peilai.
22Puhye ngaobayu maitao hai puh jünou veilou khai toulai moe,
ae mai ashi maitao nou puhye sü hraongu soupei louhoe.
23Puhye ngaobayu mai veishi sü Enou souha peilai,
ae puhye ngaorayu mai hrülaiye sü Enou southa peilai.
24Enou avei louchelou veiyu ae tobai soumoa leshi peiyu nasü teisa nou puh hi bulai,
ae Enou puhye sü panou kolou ngalou koutelai.
25Enou puhvei vedei sü Mediterranean zai hinou poa Eupheritis Rei hi koute souduso papeilai.
26Puhnou ahi haibüa paolai,
‘Nenou apuo-e, ae avei Ramai-e;
ne hai Eye vupa-apeio ae khailupa peiyu nasüe!’
27Enou puhye sü anahpoutu naraio nasü soupeilai,
ae vemai hrülai hrohinou dukayu nasü soupeilai.
28Enou puh hi apaokhai touyu teitei sü souvete peilai,
ae Enou puhye koa vo soukhai touyu nasü teisa nou bukoute peilai.
29Enou puhvei tyaosholea sü panou teisa bukoute peilai,
ae puhvei vebuh nasü panou ratei büa akhai bulai moe.
30“Ana puhvei tyaosholea maitao nou avei chikha khesü zülou more toulouzü,
ae avei kharochi thaifüa hrümore toulouzü,
31ae Enou paodu peiyu khesü ngaophou molouzü,
ae avei chikha thaifüa talou more toulouzü,
32süthaisü Enou puletaoye sü puletao nou mahmo souyu donou tudee peilai,
ae puletao nou kaomoa soupfü khaitouyu donou puletaoye sü souvea peilai.
33Ana Enou David ye sü leshi koute peilai,
ae puh hi apaokhai touyu khesü Enou souvete moyu sü soulai moe.
34Enou puhye koa vo soukhai touyu nasü pfütho laimoe,
moyuma Enou puh hi chaachou soukhai touyu khesü ali koute-a souvete peimoyu sü soulai moe.
35“Ha teitei sü Enou bakha ali soua avei sheeyu zhih hinou chaachou souwure;
Enou David hisü dayu hai soukhai toulai moe.
36Puhye panou tyaonah bukoute peilai,
ae Enou teinghi hamo koute puhvei vedei sü zhupeilai.
37Khouh büa panou teisa sü bukoute peilai,
ratei bubusa sü panou bukoute peilai.”
Veo nou Hraongu Ngaoyu donou Dopfüyu
38Ana nenou dolouyu veoye sü nenou lekha loure;
nenou puhye sü chuo malaiwure ae popei more.
39Nenou puhye koa vo soukhai touyu nasü pfüthowure
ae puhvei veo peirü nasü konai hi laithou peiwure.
40Nenou puhvei nuhdu kivo khesü dakhowure,
ae puhvei reikhao buh khesü soushi peiwure.
41Ludu tacho poa kouyu mai hrülai nou puhvei na khesü vaoloure,
ae kinapa mai hrülai nou puhye sü konüa bure.
42Nenou puhye ngaobayu maitao hisü veilouyu nasü peire,
nenou puletaoye sü sousava peie.
43Nenou puhvei reih basei khesü soushi peiwure
ae puhye panou reihbu hinou hraongu ngaore.
44Nenou puhvei bah hinou puhvei khekai nasü polai peiwure,
ae puhvei vebuh nasü deiphi hi soukaokou khaipeiwure.
45Nenou puhvei hrümai veiyu nasü soujü laiwure,
ae puhye sü panou hraongu pfüa bure.
Khailupa Peio tea Veachi Paoyu
46 Mapaowo, ne teisa nou tutsüloua bailaiwu?
Teile kasho nevei lekha rarou nasü mei büa kei-a bulaige?
47Avei hrütou hai daizhou koute jüsa licho peio,
thai-a bailaiyu mai hai nenou soupeia baie touyu sü ngaipeiso.
48Hriyu maitao hai thaonou thai moa bulaige?
Thaonou khüh hi loumoa lahye vupalou süyu khouko sü bue?
49 Mapao, nenou raichoki Etaoye leshi peiwe touyu vei shee sü daiki bue?
Nenou David hi apaokhai touyu khesü daiki bue?
50Nevei kilai Eye mainou kabüa hraongu soupeiwe,
ae neye sümoyu maitao nou Eye kabüa chaa peiwe touyu khesü ngaipeiso.
51Oh Mapaowo, nevei ngaobayu maitao nou nenou dopa louyu veoye konüa ngaophou moyu sü soupeiwe!
Puhnou tayu buh veishi hisü puletao nou ngaophou moa konüa lai-a baire.
52 Mapao ye sü teisa nou paosholo!
Amen! Amen!
Currently Selected:
LOUTAO 89: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
