LOUTAO 9
9
Kaozü hinou Vah Soupeiyu donou Ramai hi Kalo Paoyu
1Oh Mapaowo, Enou neye avei tsüle teitei nou peia paosholai;
nenou soupei khaitouyu khupa vah teitei sü Enou paolai.
2E ne vanou asa shoa lou soulai.
Akukulai hi buyu Ramai, Enou neye lou sou sholai.
3Eye ngaobayu maitao hai neye ngaolouyu phaki dakhai ta-a baiwe;
puletao hai kaodu ta-a bailai.
4Nevei chiku peiyu hai veie ae züe,
alia nenou avei leli ae ajüpa hinou chi sü kupeie.
5Nenou tyahrü kukheye züpeie,
ae mai ashi maiye sü souha peie;
puletaoye sü teisa nou lichopu khailai more.
6Etaoye ngaobayu maitaoye sü souhakhai touwure;
nenou puletao vei nuhdu khesü souha peiwure,
ae puletaoye teisa nou ngaiche khowure.
7Ana Mapao hai teisa vei veo süe;
chikure donou puhnou vebuh sü soushu loure.
8Puhnou deiphao maiye acheche hinou tukhasa-a bupeie;
puhnou kaozü hinou tyahrütaoye chiku peie.
9Mainou souvea laiyu maitaoye donou Mapao hai baibue,
veaho-a buyu phaki kaovei-a sochao loure buh alie.
10 Mapao, neye süyu maisü neye louchewe;
ne hi veyu mai taliye nenou thaopei moe.
11Zion hinou buyu Mapao ye lou sousho khaio!
Puhnou souyu vahtao sü tyahrü hülai hi paongao peio!
12Veaho-a laiyu maiye Ramai nou licho peie;
puhnou puletao vei krayu nasü ngaipei moe,
ae puletao hi kaomoa souveayu maiye puhnou tudee peie.
13Oh Mapaowo, Eye zhuvea peio!
Eye ngaobamai nou souveayu avea sü zhupeio!
athai hinou Eye vupa peio, Oh Mapaowo.
14Sübüa Eye panou Jerusalem hi buyu maitao nghoujü laloure donou alia neye daidonou paoshowe touyu sü Enou puletao hi paongao peire donoue.
Nenou Eye khailu peiyu donou E asalai.
15Tyahrü kukhe maitao hai lah puletao nou hekhai touyu deibvü hi deloure;
puletao hai lah nou rüh southou khaitouyu hinou muloure.
16 Mapao hai puhvei checheyu chidei hisü nou lah puhye süngao peiwe,
ae mai ashimai hai lah puletao vei rüh hinou muloua baiwe.
17Mai ashi maisü khü hi dakhai loulai,
Ramai ye ngaiyu mai hrülai hai khü hi dakhai loulai.
18Touhayu maiye sü teisa nou ngaophou moyu soulai moe;
veaho laimai vei areih sü teisa nou ha-a bailai moe.
19Tave peio, Oh Mapaowo! Maiye panou ne jünou ngalouso!
Tyahrütaoye sü ne nghoujü hinou save chiku peikhaio.
20Oh Mapaowo, puletaoye sü soupi peikhaio;
puletao hai thai-a bailaiyu mai baie tiyu nasü panou sülou khaio.
Currently Selected:
LOUTAO 9: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
