LOUTAO 10
10
Kaozü nasü panou Soupeire donou Veachi Paoyu
1Oh Mapaowo, ne daidonou hoshoa nou buwe?
Etao nou veaho-a buyu phaki ne daisounou tutsü louwe?
2Mai ashimai nou khaophu soua touhayu maiye souvea-a bure;
puletao nou soukhai tiyu sho-rü hisü lah puletaoye panou mulou theo.
3Mai ashimai nou lah puletao vei jüpa hinou le dusho loure;
puletao hai dutounüyu nasü veiwe tiloua Mapao ye sü paoshiwe.
4Mai ashi mainou khaophu zhai souloua Mapao ye sü ngaophou more;
puletao vei tsüle hisü Ramai touyu ali-a hare.
5Mai ashimai nou soupfüyu vah veishi sü veilouwe.
Puletao nou Ramai vei chikuyu sü zhingao moe;
puletaoye ngaobayu maitaoye sü puletao nou jünüa baiwe.
6Puletao hai lah nou lah hi haibüa paoe, “Etao hai kaodu takhai toulai moe;
Etao hai veahoyu daokhai toulai moe.”
7Puletao vei mü hisü chaayu, dayu ae pirayu nou phoua bue;
puletao hai chi ashi ae kaomoyu chi-la paoyu hai thashoe.
8Puletao hai nuh kinou tutsüa bue,
ae mah hayu maiye southare donou dapoa nou bue.
Puletao hai lelou hoyu maiye kheikhei soua chohpoa nou bue;
9khaosouveo büa puletao nou tutsüa buyu buh hinou kho-a bubaiwe.
lelou hoyu maiye nüloure donou dapoa nou bue;
puletao nou lelou hoyu maiye sü puletao vei rüh hinou muloua sapoa ta-a baiwe.
10Veahoyu maiye sü dakhaowure, puletao hai kaotare;
puletao hai puhvei khouko khevai loure.
11Mai ashi maitao nou haibüa lah puletao hi paoe, “Ramai nou ngaiwure!
Puhvei nghithou sü mailoure ae Eye ngaolou hore!”
12Oh Mapaowo, maishi maitaoye sü tudee peio!
Veahoyu maiye sü licho peio!
13Daidonou maishi mainou Ramai ye paoshiwe,
ae puletao nou haibüa paoe, “Puhnou Eye souvea laimoe?”
14Ana nenou ngaowe, lelouho mai nou veayu ae sounou souyu sü nenou zhua nou bue
ae teile busasü soukha peire donou bue.
Lelou hoyu mainou puletao vei hrümamai sü ne bah hi thaothou peiwure;
nenou teisa nou veaho laimaiye soukha peie.
15Mai ashi mai ae hashi souyu maivei khouko sü souha peio;
puletao nou vah shi soukhai touyu donou tudee peio;
puletao nou vah ashi khesü bailoumo koute tudee peio.
16 Mapao sü akhai ha-a teisa nou veo sü soulai.
Rah kukheye thoyu maitao hai puhvei teidei hinou hata-a bailai.
17Oh Mapaowo, lelou hoyu maivei veachi sü nenou keinou peilai;
nenou puletao vei tsüle sü soudu peilai.
18Veaho laimai ae rounahtou vei krayu pai sü nenou kei peilai;
nenou puletao vei jüpa hinou chiku peilai,
sübüa deiphao maiye panou puletaoye sü soupipu laimoe.
Currently Selected:
LOUTAO 10: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
