LOUTAO 88
88
Kra-a nou Soukha Khoyu
1Eye khailupa apeio, Ramai Mapao,
Enou heamajü kra-e, ae khei koua Enou ne hi ve-e.
2Avei veachi sü kei peio;
Enou kra-a soukha khoyu nasü noupeio.
3Ewo veahoyu khaikho ve dao-a bubaire,
südonou Ewo thaiyu nghitei baire.
4Thaita laiyu mai ali raibüa Ewo bu baire;
avei khouchi veishi sü hare.
5Thaimai hrohi poa Eye sü laithouwure;
southa loua khüh hi pokhai touyu mai ali büre.
Licho khailai moyu mai ali büre,
ae nenou soukha louhoyu mai ali büa khaiwure.
6Nenou Eye sü thoushoyu khüh,
zhikayu ae thoukayu buh hisü laithou khaiwure.
7Nevei lekha rarou sünou apei hi sühsho-a nou khaipeie,
ae sünavei dzü khüpayu nanou Eye maoloure.
8Nenou avei samai khamaiye sü panou Eye thaowua tare;
ae puletaoye panou Eye ngaora shoyu nasü soupeie.
Eye sü khube khaiwure ae tupalou hore;
9veahoyu donou anghithou sü halia ngaolou hore.
Mapaowo, teithetsü Enou neye kuwe,
ae abah sü lapoa nou ne hi veachi paoe.
10Nenou thaitayu maitao hi khupayu vah khesü soungao peiwu?
Puletao nou tashuloua neye paosho laivu?
11Nevei tobai soumoa leshi peiyu nasü khüh hi paongao peilaiwu?
Moyuma nevei chilee checheyu nasü soukanghi khaitouyu buh hinou paopeivu?
12Nevei khupayu vah haso khesü zhitei touyu buh hinou ngaolaivu?
Moyuma nevei aveih nasü mainou ngaiyu teidei hinou ngaolou süvu?
13 Mapaowo, Enou ne hinou soukha peio tea khowe,
shona tsü sü Enou ne hi veachi paoe.
14 Mapaowo, daivanou ne Eye malaiwe?
Ne daidonou ahinou tarei tawe?
15E nahle-a bukinou veahoyu khesü daoshore, ae thaiyu nore;
nenou Eye tudee peiyu vanou chuo E haliro soulou hore.
16Nevei lekha rarou sünou Eye soushi peiwure,
nevei zhaipou ashi sünou Eye souhawure.
17Puletao nou heamajü Eye sü dzüdu nou sühao poa buyu büa buloure;
puletao nou Eye sü sühao loure.
18Nenou avei sapokha veikayu maitao koutea panou Eye sü thaowua tare,
chuo teimai teizhi na likhei avei samai soua bubaire.
Currently Selected:
LOUTAO 88: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
