LOUTAO 85
85
Ramai vei Soukha Khoyu
1 Mapao, nenou nevei teideiye sü zhuvea peie;
nenou Israel maiye sousava pupeie.
2Nevei maitao nou mahmo soukhai touyutao,
ae puletao nou soupfü khaitouyu mah veishi sü nenou khaipeie.
3Nenou puletaoye sü rarou peipu more,
ae nevei lekha teitei sü puletao hinou podakhai laipeie.
4Etaoye khailupa–apeio, Oh Ramai, Etaoye sa-a dakhai vepeio,
ae Etao pei hi vamoyu nasü polai peio.
5Ne Etao pei hi teisa nou rarou bailaivu?
Nevei lekha nasü khaitalai mowu?
6Etaoye soukhou souhripu peio.
Nevei maitao, Etao nou neye sü paosholai.
7Oh Mapaowo, nevei tobai soumoa leshi peiyu nasü Etaoye ngaopeio,
ae nevei khailupa peiyu nasü Etao hi peio.
8Ramai Mapao nou chi paoyu nasü Enou kei nou bue;
daiolouzü puhnou puhvei maitao, ledaloua puh hi dakhai velouyu maiye sü puhnou kaonayu nasü peilai touwe.
9Cheche vujünou puhye tsükhoua buyu maitaoye sü puhnou khailu peilai,
ae puhvei khouko ava nasü teisa nou Etao vei teidei hisü bupeilai.
10Tobai soumoa leshi peiyu ae louchilou veiyu nasü tave daolai;
acheche ae kaonayu nasü alinou aliye mütei-a kholai.
11Louchelou veiyu nasü deiphao hinou paopalai,
ae acheche nasü raki vanou zhu koulai.
12 Mapao nou Etaoye sousava peilai,
ae Etao vei teidei sü thoudzü veisho-a nou peipulai.
13Acheche nasü nou Mapao vei nghoujü nou rai-a tapeilai,
ae puhye donou ludu sü souda peilai.
Currently Selected:
LOUTAO 85: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
