LOUTAO 86
86
Soukha Khoyu Veachi
1Oh Mapaowo, Enou khoyu nasü keipeio, ae Eye chila peio,
daiolouzü E khouko hare ae lülou hore.
2Eye athai hinou khailupa peio, daiolouzü Enou ne chi züwe;
Eye khailupa peio, daiolouzü E hai nevei kilai baie ae Enou neye louchewe.
3Ne hai avei Ramai-e, südonou Eye zhuvea peio;
Enou ne hisü teisa nou veachi pao-a bue.
4Oh Mapaowo, nevei kilai Eye sousava peio,
daiolouzü avei veachi paoyu nasü ne hi khetere.
5Oh Mapaowo, newo louzü veisho-e ae khaipeiyu nasüe,
ne hi veachi paoyu mai hrülai hisü,
nevei tobai soumoa leshipeiyu nasü peie.
6 Mapao, avei veachi sü kei peio,
Enou kra-a soukha khoyu sü noupeio.
7Enou veaho-a buyu phaki neye kuwe,
daiolouzü nenou avei veachi sü keinou peiwe.
8Oh Mapaowo, neye raiyu ramai ali-a ha-e,
nenou souyu büa mai linoua soupfü loumoe.
9Nenou soupei khaitouyu tyahrü hrülai nou tave neye khurülai;
puletao nou nevei aduso nasü paosholai.
10Ne hai dusho-e, ae khupayu vah haso khesü soupeie;
ne likhei Ramai sü baie.
11 Mapao, nenou Eye panou dai-e sounüwe touyu nasü doupeio,
ae Enou chilee cheche-a ne chi zülai;
avei hrümamai veishi nou peia nevei kuvah souloure donou Eye doupeio.
12Oh Mapaowo avei Ramai, avei tsüle veishi nou peia Enou neye paosholai;
nevei aduso nasü teisa Enou shapaolai.
13Nenou Eye tobai soumoa leshi peiyu nasü daizhou koute dusa!
Nenou Eye khüh hinou khailupa peie.
14Oh Ramai, khaophu souyu maitao nou Eye dulai tea laire;
ae leshi sümoyu maitao nou Eye southalai tea vere,
puletao hai neye ngaophou moe.
15Ana newo louzü, Oh Mapaowo, maiye zhuvea süyu ae leshi süyu Ramaie,
ne hai teisa nou heamea süyu, zhuvea leshi süyu ae chilee checheyu nasüe.
16Ahilo reidakhai vepeio ae Eye zhuvea peio,
Eye soukhou soutsü peio ae khailupa peio,
daiolouzü apfü nou souyu büa Enou nevei kuvah sü soue.
17Oh Mapaowo, nenou Eye zhuvea peiwe touyu shee ali Eye ngaopeio,
nenou Eye savayu ae soukha peiyu nasü
Eye ngaorayu maitao nou ngaoloure toulouzü puletao hai hraongu ngaolai.
Currently Selected:
LOUTAO 86: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
