LOUTAO 83
83
Israel Maiye Ngaobayu Maitaoye Soukanghi Peio tea Veachi Paoyu
1Oh Ramai, pai khai timoa bupeiso;
nasei teanou zei tea bupeiso!
2Zhukhaio, neye ngaoba-a buyu maitao sü shurao soua bure,
ae neye ngaorayu maitao sü neye khaitya bure.
3Puletao hai nevei maitaoye soushi peire donou shodo ashi sü kheikheisou soua bure;
nenou khopeia buyu maitaoye sü puletao nou do ashi soua nou soushi peilai tea bure.
4Puletao nou paoe, “Khe, puletao vei tyahrü veishi nou souha peilai she,
sübüa Israel maiye panou teisa nou ngaibailai khe!”
5Puletao nou tsüle ali souloua me zholoure;
puletao nou ne pei hi hrailai donou vo souloure:
6Edom ae Ishmael maitao;
Moab ae Hagrits maitao;
7Gebel, Ammon ae Amalek maitao;
alia Philistin ae Tair maitao;
8Assaria maitao-a puletaoye louzho loure,
sübüa Lot vei tyaosholea Ammoa ae Moab maiye koa khouchi shoyu reihmai me ali souloure.
9Nenou Midian mai hi, alia Sisera
ae Jabia maitaoye Kishon Rei hinou soupeiyu büa puletao hia soupeio.
10Puhnou puletaoye sü Endor hinou souha peie,
ae puletao vei thaiphao sü panou deiphi hinou tangia khaipeie.
11Puletao vei süthai-apei maitaoye sü nenou Oreb ae Zeeb hi soupeiyu büa soupeio,
puletaoye khasa-a hrüyu mai hrülaiye sü nenou Zebah ae Zalmunna hi soupeiyu büa soupeio,
12puletao nou haibüa paoe, “Ramai vei teidei nasü Eletao vei souloure donou polou laikhe.”
13Oh Ramai, puletaoye sü teikhai nou hüpoa tayu naihü büpeio,
ae teikhai nou hüpoa tayu thouba büpeio.
14Hiphao hai mei nou deiyu büa,
deichi phao hai mei nou deilaiyu büa
15puletaoye sü nevei teikhai teirü ashi sünou hulai peio,
ae nevei teikhai shishoyu sünou soupi tsütsü khaipeio.
16Oh Mapaowo, puletao pah sü panou hraongu nou hopfüa bupeio,
sükulouzü puletao nou nevei khouko nasü süloulai.
17Puletaoye sü panou hraongu ngaoyu soupeio ae teisa panou ngaopia bulo;
puletaoye panou chaa ngaoa thaita-o.
18Ne likhei Mapao nasü baie,
teideiphao teitei pei hinou kukulaio nasü baie touyu hai puletao panou sülo.
Currently Selected:
LOUTAO 83: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
