LOUTAO 80
80
Tyahrü Naye Podakhai Peire donou Veachi Paoyu
1Oh Israel maivei Zhaokhopu, Etao vei pai kei peio;
zhaotu me ali büa Etaoye süthai peipu, Etao chi nou peio.
Shouh pfüyu cherabim khaona phaova nou vebuh soua buyupu,
2Tave Ephraim, Benjamin ae Manasseh maitao hi ne zhu ngaopeio.
Nevei khouko nasü tave Etao hi ngaopeio;
taveloua nou Etaoye khailupa peio!
3Oh Ramai, Etaoye poa dakhai ve peio!
Nevei zhuvea nasü Etaoye tave ngaopeio, sükulouzü Etao hai khailu loulai.
4Khoukhoulai Ramai Mapao, teile kasho-a nevei maitao nou veachi paoyu sü nenou raroua bulaige?
5Nenou Etaoye sü veahoyu hai touso touyu büa panou toua bure,
ae dzü keyu büa panou nghidzü nou ke-a bure.
6Nenou Etao vei teidei hisü panou kinapa soua buyu tyahrütao nou reih huloure,
ae Etaoye ngaobayu maitaoye sü panou paoshi-a bure.
7Oh Ramai, Etaoye sa-a dakhai ve peio!
Nevei zhuvea nasü Etao hi tave ngaopeio,
sükulouzü Etao hai khailu louyu sü ngaolou süe.
8Nenou darkhabe ali Ejipt hinou pove peie;
nenou tyahrü kukheye sü hulaiwua sünasü puletao vei teidei hinou shopeie.
9Nenou sünasü panou veipa loure donou phi soupeie,
sünasü dei khevai thoushoa nou maa tsülouloua dei veishi sü kei phouloure.
10Deichi khesü sünanou tsüpa phouloure;
sedar süübe khesü süna botao nou keiho loure.
11Süna vei süübotao nou kei poa Mediterranean Zai hi koute koure,
ae Euphratis rei hi koute-a vere.
12Daidonou ne sünavei bokha khesü hrapa peiwe?
Chuo süphi hi talai veyu mai tarali nou darkha shithou sü haitoulou bailaire;
13rekou buyu nü khenou deisasawure,
ae rekhaona khenou sünasü toua nou bure.
14Khoukhoulai Ramai, Etao hi dakhai ve peio!
Raki vanou Etaoye zhu kou peio;
tave nevei maitaoye khailupa peio.
15Nenou shopeikhai touyu darkhabe nasü tave vupa peio;
nenou veisho-a panou keipayu darkhabe nasü kiko peio.
16Etaoye ngaobayu maitao nou sünasü viloua meidei peiwure;
puletaoye sü nevei lekha rarou sünou zhuloua souha peio!
17Nenou dopa louyu maitao,
ae nenou soudusopa peikhai touyu tyahrü nasü vupeio.
18Eletao nou ne hinou tutapu khailai more;
Etaoye panou hria bulo, ae Etao nou neye teisa nou paosholai.
19Khoukhoulai Ramai Mapao, Etaoye sa-a dakhai vepeio.
Nevei zhuvea leshi nasü Etaoye ngaopeio,
sükulouzü Etao hai khailu louyu sü ngaolou süe.
Currently Selected:
LOUTAO 80: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
