LOUTAO 79
79
Tyahrüye Khailupa Loure donou Veachi Paoyu
1Oh Ramai, neye sümoyu tyahrü
kukhe maitao nou nevei teidei hisü reih huloure.
Puletao nou nevei sheeyu Rathoki nasü souzhai khaiwure
ae Jerusalem sü soushi souka nghiwure.
2Puletao nou nevei maitao pfüphao sü panou tei hi raohouye pa toure donou khaipeie,
nevei kilai maitao vei thaiphao hai panou rekhaonaye toure donou khaipeie.
3Puletao nou nevei maitao zhe hai dzü büa soupa peie;
zhe sü Jerusalem teitei hi dzü büa küre,
ae puletaoye sü mai linoua daovu peire mai hare.
4Etao hai kinapa maitao hinou hraongu sü ngaore,
puletao nou Etaoye sü konüre ae ngaophou moa Etaoye sü pahnü soupeie.
5Oh Mapaowo, ne Etaoye teisa nou raroua bailaiwu?
Nevei lekha rarou nasü mei taoyu büa teisa nou tao-a bubai laidou?
6Nevei lekha rarou nasü neye tho moyu tyahrütao hi vepeio,
ne hi veachi pao moyu maitao hi vepeio.
7Daiolouzü puletao nou nevei maitaoye sü southawure;
puletao nou nevei teidei nasü soushi peiwure.
8Etao vei paipaoh maitao nou mah soukhai touyu donou Etaoye tudee peiso.
Etaoye chunou thashoa zhuvea peio;
daiolouzü Etao hai areih sü hazei baire.
9Etaoye soukha peio, Oh Ramai, Etaoye khailupa peio;
neye tsükhou loure donou Etaoye vupa peio
ae Etao vei mahmo khesü khaipeio.
10“Neletao vei Ramai sü daikinou bue?” tea daisounou
tyahrü kukhe maiye panou Etao hisü chi nouwe?
Nevei kilai maitao zhe soukou peiyu donou
nenou tyahrü sütaoye tudee peiyu nasü Etao hi soungao peikhaio.
11Hukhaki hinou buyu maitao nou lea buyu paisü keipeio,
ae nevei khouko sünou, southa laire tea buyu maitaoye sü khailupa peio.
12 Mapaowo, neye konüa buyu tyahrütaoye sü puletao nou soupfüyu deida anai koute hai nenou puletao hi soupeio.
13Süthaisü nevei zhaokhome, nevei maitao,
Etao nou neye teisa nou kalo paolai,
ae vere teile veishi hinou neye paosholai.
Currently Selected:
LOUTAO 79: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
