LOUTAO 78
78
Ramai ae Puhvei Maitao
1Avei maitaore, Enou doupeiyu khesü keilo,
Enou paoyu achi sü leloua kei noulo.
2Enou veishoyu chipaotao
ae daoh maivei ko tateiyu khesü paongao peilai,
3Eletao nou süchoua buyu kotao,
puopoah maitao nou paodaikhai touyu taosü Enou paopeilai.
4Etao nou sütao hai Eletao vei nahmai hinou poku khailai moe;
Etao nou vere bonakha hisü Mapao vei khouko ae puhnou khupayu vah haso soupeikhai touyu khesü paopeilai.
5Puhnou chikha khesü Israel maitao hi peie,
ae kharochi khesü Jakob vei tyaosholea hi peie.
Puhnou Etao puopaoh maitao hi chikha khesü puletao vei nahmaitao hi paodai khaipeio tea kharochi peie,
6sübüa vere bonakha hai panou puletao hinou douloua puletao vei nahmaitao hisü paodou peilai.
7Haibüa nou souyu hai puletaoye panou Ramai ye lülouche loua puhnou soupeikhai touyu vah haso khesü panou ngaimore donoue,
ae puhvei chikhatao hai zü loure donoue.
8Puletaoye panou puletao vei puopaoh maitaoye raimore donoue;
puletao vei puopaoh maitao hai khaitya-a paochi züba-e,
Ramai hi puletao vei tsüle teitei nou pei moe,
ae puh hinou chilee cheche-a bukoute moe.
9Ephraim maitao hai reih souyu teithe zhou nou voulou ae voulouthou sü pfüloua tutare.
10Puletao nou Ramai ye koa vo soukhai touyu nasü pfüthowure,
ae puhvei chikha khesü züba-e.
11Puletao hai Ramai nou khupayu vah haso soupeikhai touyu khesü ngaiwure.
12Puletao vei puopaoh maitao nghoujü nou Ramai nou khupayu vah haso hai
Ejipt maivei teidei Zoan deikho hinou soungao peie.
13Puhnou zaidu nasü souko laipeia puletao panou tacho paloue;
ae dzü sü kivo büa latsü tea panou chao-a khopeie.
14Puhnou puletaoye sü heakou hai teihao panou khosa-a tapeie,
ae khei ki hai mei ava nou süthaisa-a tapeie.
15Radeiki hi tayu phaki, puhnou chuh hinou dzü hai dapa peie,
ae puletaoye panou dzü hai zai hinou keyu büa ke loue.
16Puhnou chuhdu vanou dzü hai reitou büa panou küpa peie,
ae rei büa panou dzü sü kü peie.
17Ana puletao hai radeiki hinou Kukulai hi Abuo Ramai pei hi khaitya mahmo khesü soua baie.
18Puletao nou tounüyu touso khesü kho-a puletao nou Ramai ye sü la-a zhai zhue.
19Puletao nou Ramai ye ngaophou moa haibüa paoe,
“Ramai nou radeiki hai hinou touso khesü peilou süvu?
20Puhnou chuh sü dapeia panou dzü sü reidzü küyu büa küpa peie;
ana puhnou raokhao ae sou hai puhvei maitao hi peilou süvu?”
21Südonou süsü Mapao nou choulou khai-e, puh hai rarou sholure;
puhnou puhvei maitao hisü mei seikou thoupeie,
ae puletao hisü raroupu loure,
22daiolouzü puletao nou Ramai ye sü lü moe,
ae puletaoye khailupa peilou süe touyu nasü louche pei more.
23Ana puhnou rateiye sü kharochi peia panou raki kikhu sü houpeie;
24ae puhnou puletaoye panou toure donou manna sü seikou peie,
ae rakiva thou sü puletao hi peie.
25Südonou puletao hai rakivamai vei touso sü tou-e,
ae puletaoye panou tounüyu veishi sü puhnou peie.
26Puhnou teinghi palova teikhai sü panou hüve,
ae puhvei khouko sünou khelova buyu teikhai sü panou hü shisho vepeie;
27ae puhnou puhvei maitao hi raohou khesü reipe hi buyu vonai zhoua hüve peie.
28Raohoutao hai puletao vei fühao toutsü hi ae puletao vei sahpao pehao teitei hi dekou peie.
29Südonou maikhe mai hai sütao sü touloua rukhare;
puletao nou jüpayu veishi sü Ramai nou puletao hi peie.
30Ana puletao nou thainüa touyu touso nasü touche loumoa bukinou,
31puletao pei hisü Ramai vei lekha rarou nasü vere,
ae puletao hrohinou khoukayu maitao ae nahle maitao hrohinou pfüphao veikayu maitaoye sü southawure.
32Haibüa vepa-a buyuma maikhe mai hai mahmo khesü soukoute-a bubaie;
puhnou khupayu vah haso tyatyali soupeia buyuma puletao hai puhye louche peimore.
33Südonou puhnou puletao vei teithe teile sü ssü haiyu büa souhawure,
ae puletao vei hrümamai hai thashoa panou pishiyu hinou akhai soupeie.
34Puhnou kamaia southa peiyu phaki,
mai kukhe maitao hai puh hi dakhai ve-e;
puletao nou ledaloua puh hi soutaosoua veachi sü paoe.
35Ramai hai puletaoye vupa-apeio nasü touyu hai puletao nou licho veloue,
ae Khoukhoulai nanou tave puletaoye soukha peie touyu puletao nou süloue.
36Ana puletao nou müvei müthea nou puh hisü dayu chi nou pao-a baire.
37Puletao vei tsüle hai puh hinou lachü tea bumoe;
puletao nou koa puhye vo soukhai touyu nasü puletao nou chilee cheche-a thaifü peimoe.
38Ana Ramai nou puhvei maitaoye sü zhuvea peie,
puhnou puletao vei mahmo khesü khaipeie
ae puletaoye sü souha pei moe.
Vu taoli hai puhvei lekha rarou nasü khailoua panou pamoe.
39Puhnou puletao hai thai-a bailaiyu mai ali baie,
teikhai nou hüta-a dakhai vemoyu büa baie touyu sü licho loua baiwe.
40Vu kizhou koute puletao nou puhye rekounou khaitya peie;
vu daizhou koute hai puletao nou puhye radeiki hinou le souvea peie!
41Puletao nou Ramai ye daibü laisa tea zhuyu thainou zhupu khaikhai peie,
ae Israel maivei Sheeyu Ramai ye sü souvea shopeie.
42Puletao nou puhvei khouko ae puletaoye ngaobayu maitao bah hinou khailupa peiyu teithe nasü licholou more.
43Puletao nou puhvei vah haso soupfüpei khaitouyutao ae Ejipt maivei Zoan deikho hinou khupayu vah soupeiyu khesü ngaiwure.
44Puhnou reidzü khesü zhe hi souda thou peie,
ae Ejipt maiye panou kere dzü sü souha peie.
45Puhnou puletaoye souvea peire donou puletao hisü khaomai seive peie,
ae vaoye panou puletaoye soushi peie.
46Puhnou khazü seive puletao vei shinamara khesü touloue,
ae puletao vei dou sü soushi khaipeie.
47Puhnou puletao vei darkhabe khesü panou reithou nou kou souha peie,
ae doushibe khesü panou vüra nou soushi peie.
48Puhnou puletao vei kikhaorü khesü reithou panou kou deitha peie,
ae zhaotu nghitu me khesü teipeiyu sünou southa peie.
49Puhnou puletao hi puhvei rarou lekha ae chaa sü seikou souvea peie,
ae soushi soukanghire donou rakivamai me aliye seive peie.
50Puhnou puhvei lekha nasü nuchao khaimoe,
moyuma puletao vei hrümai sü vupapei moe,
ana puletaoye southare donou rahta rahvu nasü seive peie.
51Puhnou Ejipt hi nah narai nahpoutu mai hrülaiye sü southa khaipeie.
52Süthaisü puhnou puhvei maitaoye sü zhaotu büa süthaisa-a papeie,
ae radeiki hinou zhaokhome ali büa puletaoye süthaisa-a tapeie.
53Puhnou puletaoye panou kaozhou ashi daomoa süthaisa-a tapeie,
ae puletao hai ngaopi moe;
ana puletaoye ngaobayu maitao hai zaidzü nou maokhai touloure.
54Puh lah veilouyu deichitao,
puhvei sheeyu teidei hisü puhnou puletaoye save thoupeie.
55Teidei sühinou hrüa buyu tyahrü kukhe maitaoye sü puhnou puhvei maitao talouyu phaki hulai peie,
puhnou puletao vei teidei sü Israel maitaoye zha dadezhi peie,
ae puletao vei ki khesü puletaoye panou hrüre donou peie.
56Ana puletao nou Khoukhoulai Ramai ye sü khaitya pare
ae puhye daibü laisa tea zhutare.
Puletao nou puhvei chikha khesü züpei more,
57ana puletao hai puletao vei puopoah maitao büa khaitya pare,
ae chilee cheche more, puletao hai khirukaoyu vouloushu ali büa baire.
58Puletao nou rashitaoye thoyu buh souyu donou puhvei rarou sü soupa peie,
ae basharataoye thoyu donou puhvei lekha sü daipa peie.
59Sütao hai puhnou ngaolou khaie Ramai hai lekha pare,
südonou puhnou puhvei maitaoye sü malaiwure.
60Puhnou Etaoye koa sabuyu sahpao,
puh buh Shiloh#78.60 shiloh: David veo teile jü hi, buh haina hai Israel maivei matsü kayu rathoyu buh alie. nasü thaowua tare.
61Puhvei khouko ae kathe nasü Etao hi bue tea shee soua buyu
Vo Sübvü nasü panou ngaoba maiye shaopoa tare.
62Puhnou puhvei maitaoye rarouyu donou puletaoye sü ngaoba maitao panou southawure.
63Nahleyu maitao hai soureih hinou southawure,
südonou nahleyu naotu maitaoye mai linoua na peire mai hare.
64Napao maitao hai kho-nghou hinou thaire,
ae puletao vei mimea maipfütaoye panou kra-a dopfü baide.
65Süthaisü khouchi shoyu mai ali nou zhaoh soloua shura souyu büa Mapao nou tashu loure.
66Puhnou puhye ngaoba-a buyu maitaoye sü teisa panou hraongu ngao-a bure buh hisü hukou thoupeiwure.
67Ana puhnou Josef vei tyaosholea maitaoye sü malaire,
puhnou Ephraim khü-a dolou more.
68Anou puhnou Judah khü sü dopaloure,
ae puhnou jüpa shoyu Zion Deichi nasü doloure.
69Puhnou buh sühinou rakiva puhvei ki buyu na büa puhvei Rathoki sü souloure;
Puhnou teisa panou khouchia buloure donou deiphao soupeiyu büa sünasü soushupa peiwure.
70Puhnou zhaotu kho-a buyu puhvei kilai David ye sü dopaloure,
71zhaotu kho-a buyu hinou puhnou puhye saloua panou Ramai vei maitaoye khore donou Israel maivei veo sü soupeie.
72David nou le sheesha tea nou puletaoye sü kiko peie,
ae dokai veishoyu sünou puhnou puletaoye süthai peie.
Currently Selected:
LOUTAO 78: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
