LOUTAO 77
77
Veahoyu Phaki Sousava Peiyu
1Enou shusoua nou Ramai hi kra-e;
Enou shusoua kra-a nou khoe, ae puhnou avei veachi nasü kei peie.
2Veahoa buyu phaki Enou Mapao hi veachi paoe;
Enou khei mathe abah lapoa nou veachi paoe,
ana Enou savayu sü ngaolou moe.
3Enou Ramai ye tsüchoyu phaki, ale sü veare;
Enou soutaosoua puhye lichoyu phaki, Esü chathaire.
4Puhnou Eye kheimathe panou zai heapoa nou bue,
E levea buyu donou rao-a raolou hore.
5Enou raichoki teithe teile khesü tsücho vere,
ae latayu po teile taosü licho vere.
6Enou kheimathe tsüchopoa#77.6 Larübvü ali hi tsüchopoa; Hebrew lou soupoa. nou bue;
Enou lichoa buyu phaki, haibüa nou lah ahi sü Enou noue:
7“Mapao nou Etaoye teisa nou thaokhaia bailaiho?
Puhnou Etaoye leshi peipu khailai modeho?
8Puhnou Etaoye zhuvea leshiyu nasü bairevu?
Puhnou apaokhai touyu nasü vete morevu?
9Ramai hai puhvei zhuvea leshi nasü ngai deho?
Puhvei zhuvea leshiyu thaosü lekha rarou nanou bubaireho daisouge?”
10Süthaisü Enou haibüa paoe, “Avei tsüle daikayu nasü hainare—
süolouzü Ramai hai khouko hatare.”
11 Mapaowo, Enou nevei vah haso adu khesü licho peilai;
Enou raichoki nenou souyu nevei khupa vah khesü licholai.
12Enou raichoki nenou soupfüyu vah haso teitei sü tsücholai,
nevei khupayu vah haso khesü Enou lichopoa nou bulai.
13Oh Ramai, nenou soupfüyu teitei sü shee-a baie.
Rah kukhe ali-a ne büa dusho moe.
14Ne hai khupayu vah souyu Ramai nasüe,
nevei khouchi nasü nenou tyahrütao hi soungao peie.
15Nevei maitaoye sü nevei khouko sünou khailupa peie,
Jakob ae Josef vei tyaosholea maitao sü nenou khailupa peie.
16Dzütao nou neye ngaolouyu phaki, Oh Ramai, puletao nou neye ngaopire,
ae zaidu hi buyu dzü khesü ngure.
17Teihao sünou teirü kou peie;
ratei hinou tei sü süre,
ae tei peivavayu sü buliki peivava vere.
18Nevei teisüyu kho nasü nou büvere,
ae teideiphao teitei sü teipei vavayu nasünou vapha touloure,
deiphao sü nguhrührüa lülu lure.
19Nenou dzü khüpayu phao hinou tawe,
nenou zaidu nasü tachopa peie,
ana nevei phihea sü ngaomoe.
20Nenou nevei maitaoye sü zhaokhome ali büa panou Moses ae Aaron ye süthaisa-a tapeie.
Currently Selected:
LOUTAO 77: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
