LOUTAO 76
76
Veilouyu Ramai
1Ramai ye sü Judah hinou süwe;
puhvei zhih sü Israel mainou tsükhouwe.
2Puhvei ki hai Jerusalem hinou bue;
puhnou Zion Deichi hinou hrüe.
3Puhnou buh sühi sünou ngaoba maitao vei voulouthou,
puletao vei rü, khoche ae reih souyu baseina khesü soushi souha peie.
4Oh Ramai, ne hai daizhou koute duso sarou!
Nenou ngaobayu maitao jünou veiloua deichi vanou dakhai veyu phaki
nevei khouko ava nasü daizhou koute ngaoveie!
5Puletao vei khuveih shoa buyu reihmaitao hai chuo puletao vei buyu na teitei nou laolai khaiwua thaiyu mainou zü-zhiyu kua züa bure;
ae puletao vei bah sü lashupu louhore.
6Oh Jakob vei Ramai, nenou puletaoye soupi peiyu phaki,
puletao vei rheitao ae rheipfüa laiyu maitao sü dekou deithare.
7Ana Mapaowo, neye sü mai hrülai nou ngaopi-e.
Nenou rapayu phaki, mai linoua nevei nghoujü hinou la-a bulou hoe.
8Nenou nevei chidei nasü raki vanou paosü peie;
deiphao mainou ngaopia nou zei tea bure,
9nenou tashu lalou-a deiphao hinou veaho-a buyu maitaoye
khailupa peilai tea nenou chidei peiyu nasü sükuyu phaki.
10Mai vei lekha rarou nasü neye paoshopu peia bailai,
soureih souyu hinou thaimoa shokhai toua buyu maitao nou nevei khonüh khesü nülai.#76.10 Larübvü ali hi khonüh khesü nülai; phoure 10 nahai Hebrew hi sheesha toumoe.
11Nenou peilai tea apaokhai touyu nasü nevei Ramai Mapao hi peilo;
nghia buyu tyahrü hrülai, neletao vei sapeina khesü puh hi pove peio.
Ramai nou deiphao maiye panou puhye piyu sü soupeie;
12Puhnou khaophu soua buyu veo nahpoutu maitaoye sü ponakou peie
ae dushoyu veo maitaoye sü soupi peie.
Currently Selected:
LOUTAO 76: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
