LOUTAO 74
74
Tyahrüye Khailupa loure donou Veachi Paoyu
1Oh Ramai, daidonou ne haibüa Etaoye thaokhai peiwe?
Nevei lekha rarou nasü haibüa teisa nou nevei maitao hisü bua bailaivu?
2Raichoki nou nevei mai panou soulai tea dopakhai touyu maitao,
ae maivei qila soua buyu nevei tyahrü naye panou soulai tea khailupa khaitouyu maitaoye sü licho peio.
Nenou vuli hrüa buyu Zion Deichi nasü mangai peiso.
3Souka sounghi khaitouyu füdei haina sü tave zhupeio,
Etaoye ngaobayu maitao nou Rathoki hi buyu na veishi sü soushikhai touwure.
4Neye ngaobayu maitao nou nevei Rathoki hinou kolouyu reihvo sü soua bure;
puletao nou veilouyu shee soua sühi sü sahra hrakhai loure.
5Puletao nou marei poa süü daoyu mai büa süü khesü vi-a nou bure.#74.5 Phoure 5 nahai Hebrew hi sheesha timoe.
6Puletao nou kizha ae deka khesü marei ae hubao poloua dakho sasa khaiwure.
7Puletao nou nevei Rathoki nasü soushi laiwua mei deiwure;
puletao nou neye thoyu buh nasü souzhaiwure.
8Puletao nou Etaoye sü souha zeilai tea bure;
puletao nou sheeyu buh teitei sü meidei laire.
9Etao vei sheeyu shee veishi sü souhawure;
rachipaolayu mai ali-a hare,
ae teile kasho-a haibüa bukou laisa touyu hai mailia sümore.
10Oh Ramai, ngaobayu maitaoye panou teile kaso Etaoye konüa bulaige?
Puletaoye panou ne zhih sü teisa nou paoshi-a bailaiwu?
11Ne daisounou Etaoye soukha peibawe?
Ne daisounou ne bah sü shaphi loua buge?
12Ana nenou araikha hinou Etao vei veo sü soua bue, Oh Ramai;
nenou Etaoye sü vutaoli hai khailupa peie.
13Nevei khouko sünou zai dzü soukho peie,
zai hi buyu khaonghou adu nasü nenou pei khouphe peie;
14nenou Leviathan khaonghou nasü southa peie,
ae puhvei vasou panou radeiki soukhaona taoye panou toue.
15Nenou dzünghou ae dzüla khesü soupeie,
nenou reidzü khesü southe peie.
16Nenou hea-khei sü soupeie;
nenou khouh teinghi sü lahkuku nou bure buh hi soukhai peie.
17Nenou teidei akhai sü panou hai bailai tea soupeie,
nenou ka-hou ae teisai teilü sü soupeie.
18Ana Oh Ramai, neye ngaobayu maitao nou neye konüa bue touyu nasü licho peio.
ae puletao hai Ramai ye louche moe alia neye ngaora-a bue.
19Nevei lülou hoyu maitaoye sü zhaipou shishoyu ngaoba maitao bah hi thaothou peiso,
mainou souvea hoyu nevei maitaoye sü ngaipeiso!
20Eletaoye koa vo soukhai touyu nasü licho peio.
Teidei hisü taidayu ae züveiyu sünou buliki phoutao loure.
21Mainou souvea souhoyu maitaoye sü panou hraongu ngaoso;
veaho-a nou touha soha laiyu maiye panou neye paosholo.
22Oh Ramai, tashuloua nou nevei kaozü nasü soupei khaio!
Ramai ye louche moyu maitao nou neye sü tobai soumoa konüa bue touyu nasü licho peio.
23Neye ngaoba-a buyu maitao nou lekha soupoa nou sharayu ae tobai soumoa nou paira soua buyu nasü ngai peiso.
Currently Selected:
LOUTAO 74: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
