LOUTAO 73
73
LARÜBVÜ ASÜNA
(Lou 73—89)
Ramai vei Kaozü
1Cheche vuzünou Ramai hai
Israel mai hi ae tsüle sheesha-a buyu maitao hi veisho-e.
2Ana Enou puhye loucheyu sü hata nore;
avei lü sü khaita nore,
3daiolouzü Enou khaophu souyu maitaoye ngaoraiyu donou,
ae mai shiyu maitao nou ha veishi hai kaozhou veia soulou-a nou savayu khesü ngaoloukhaie.
4Puletao hai sounou soumoe;
puletao hai khouchi shoa nou pfüphao veishoa bua baiwe.
5Puletao hai mai kukhe maitao büa veahoyu sü ha-e.
Puletao hai mai kukhe büa veahoyu sü daomoe.
6Südonou puletao hai khaophu souyu nasü touh toupfüyu büa lai-a baiwe,
ae züveilai touyu sünou sabanü banouyu büa laiwe.
7Puletao vei lüthou hinou hashi sü lapa peiwe;
ae puletao vei tsüle hisü vah ashi soure donou tsücho koute-a bubaiwe.
8Puletao nou mai kukhe maiye konüpeia chila ashi sünou paopeie;
puletao hai khaophu soupoa maiye souvea peilai tea bua baiwe.
9Puletao nou raki hinou buyu Ramai ye sü paoshi peie,
ae deiphao maiye chaochao soua kharochi peiwe.
10Südonou Ramai vei maitao koute-a puletao thaisü fütare,
ae puletao nou chi paoyu khesü louche tare.#73.10 Phoure 10 nahai Hebrew hi sheesha toumoe.
11Puletao nou paoe, “Ramai nou halia süloulai moe;
Kukulai hi Abuo nanou haliro phoupa louhoe.”
12Mai ashitao nou sübüa bue.
Puletao hisü halih halanou chekho tea bubaie,
ae puletao hai toungi sho-a buyu pei hinou ngipu khaikhai-a bue.
13Enou ale shisha-a teanou buyu ae mahmo ali-a soulai moe tea buyu hai hamako baiyu phare.
14Oh Ramai, nenou Eye sü tobai soumoa veahoyu sü peie;
nenou Eye sü teithe tsü nou tudee peie.
15Enou haibüa chi paoyu thaio,
nevei mai ali nou chi paozüyu nasü pao more.
16Enou tatei shoa buyu haina vanou tsücholai tea te-e,
ana Eye donou hainasü tatei sholoure,
17nevei Rathoki hi velou loumo koute hai Eye donou tateire.
Süthaisü Enou puletao hi dai-e vepalai touyu khesü süloue.
18Nenou puletaoye sü dei jülealeayu buh hisü khai peie,
ae puletao hai hakatayu hisü delouta-a bailai!
19Puletaoye sü thashoa nou soushipei bailai,
puletao hai pishi-a nou hakayu hisü louta bailai.
20Puletao hai zhimekou büa shona kushu ngaiwu bailai;
Oh Mapaowo, nenou tashu lapeiyu phaki, puletao hai ngaomota-a bailai.
21E lekha sho-a buyu phaki,
ae ale daikhai toua pepoa buyu phaki,
22E hai soukhaona ali büa tsüvei moe;
Enou neye sü sükulou moe.
23Ana Enou ne nghiki bukoute-a baie,
ae ne bah nou Eye sü süthai peie.
24Nevei paodou peiyu khenou Eye sü khosa-a laipeie,
ae akhai hisü nenou Eye tsükhouyu hinou saloulai.
25Raki vasü neye baimoa avei nakukhe sü dai bue?
Neye bai moa Enou deiphao hisü jüpayu kukhe halia hae.
26Avei tsüle ae pfüphao sü lülouho ta-a bailai,
ana Ramai hai avei pfüchi nasüe;
Enou puhye likhei jüpa-a baie.
27Neye thao-a tayu maitao sü cheche vuzünou hakata-a bailai;
chilee cheche moyu maiye sü nenou souhawu bailai.
28Ana Enou Ramai ye nghia buyu hai Eye donou daizhou koute veisarou;
Enou Khoukhoulai Ramai Mapao ye sü avei baibu souloure.
Ae puhnou soupfü khaitouyu vah haso teitei sü Enou shapaolai!
Currently Selected:
LOUTAO 73: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
