LOUTAO 68
68
Kolouyu Tyahrü vei Lou
1Ramai ye sü panou tashuloua
puhye ngaobayu maitaoye sü panou soupho rarou laikhaio.
Puhye ngaora-a buyu maitao hai panou puh nghoujü nou tutawo.
2Meikhao hai teikhai nou hüpoa tayu büa puhnou puletaoye sü hutawure;
laivou pheroh nahai mei hüpeikhai dzü kütayu büa mai ashi maitao hai Ramai vei nghoujü hinou hatare.
3Ana acheche maitao hai lesa sho-a nou puhvei nghoujü hinou vasa-a nou bue;
puletaoye sü panou asah soua nou bulo.
4Ramai hi lou soukhiao, puhvei zhih sü lou nou sousholo;
teihao phao hinou rhei pfüa tayu puhvei ludu sü souda peio.
Puhvei zhih hai Mapao toue, puh nghoujü nou asalo!
5Ramai hai puhvei sheeyu Rathoki hinou bue;
puhnou rounahtou taovei pfüpuo sü soupeie,
ae mimea maipfütaoye sü vupa peiwe.
6Puhnou dopfüa lah likhei buyu maiye panou buchao loure donou ki sü peie,
ae hukhaki hinou buyu maiye sü sapa panou lahdo sou-a savayu sü peie.
Ana puhye khaitya duyu maiye sü panou dopfüa mai hrümoyu buh hinou hrülai.
7Oh Ramai, nenou nevei maitaoye süthaisa-a tayu phaki nenou radeiki hi takouyu phaki,
8deiphao sü lüre, ae ratei hinou teirü sü rükoure,
daiolouzü Sinai Deichi hi Ramai nou takouyu donou,
ae Israel maivei Ramai nou takouyu donou.
9Nenou tei sü panou rücha toupeie,
sübüa shitayu teideitao sü nenou souveipu peie.
10Nevei maitaoye sü panou sübüa buh sütao hinou hrülouyu sü soupeie,
nevei zhai aveih hisünou veaho-a laiyu maiye donou nenou souda khaipeie.
11 Mapao nou kharochi sü peie,
ae naotumai taoli nou ko aveih nasü pota-e;
12“Veo maitao alia puletao vei reihmai metao sü tutare!”
Ki hinou buyu naotu maitao nou polouyu na khesü zha zhiloue:
13shahu nou souhokhai touyu rahoutao,
sütao vei shouh hai sana veitya bütoua reivavawe.
(Neletao kamai-a daisounou reih souyu teithe zhou hai zhaotu khaiyu buh hinou buwe?)
14Khoukhoulai Ramai nou veo maitaoye Zalmon deichi hinou soupho rarou peiyu phaki,
puhnou buh sühisü panou vüra sü koue.
15Bashan deichi nasü daizhou koute khouchi-e,
deichi süna hai deitao taoli bue!
16Neletao daisounou khouchi shoa buyu deichi hinou Ramai nou hrüre donou dopa louyu deichi vanou maiye ngaorai-a nou zhuwe?
Mapao nou sühisü teisa nou hrüa bulai!
17Rheiluki thethe pfüa nou Mapao hai Sinai deichi hinou sheeyu buh hisü velai.
18Puhnou kushoyu buh hisü hukhamai taoli nüpoa patare;
puhye khaitya-a duyu maitao hinou sapeina khesü puhnou poloure.
Ramai Mapao nou sühisü teisa nou hrülai.
19Eletao vei veakou hai teisa nou pfükha peia buyu Mapao ye sü paosholo,
puh hai Etaoye khailupa peiyu Ramai nasüe.
20Etao Ramai hai maiye khailupa peiyu Ramai-e;
puh hai Mapao-e, Etao vei Mapao süe,
Etaoye athai hinou khailupa peiyu nasüe.
21Ramai nou puhye ngaoba-a buyu maitao pei dakho peilai,
thaokhai toumoa mahmo soua laiyu maitaoye sü puhnou souha-a bailai.
22 Mapao nou paoe, “Neletaoye ngaobayu maitaoye sü Enou Bashan hinou podakhai ve peilai,
Enou puletaoye sü zai thoushoa buyu hinou podakhai ve peilai,
23sübüa neletaoye ngaobayu maitao vei zhe hinou neletaoye panou hopoa talai,
ae neletao vei sei khesü panou puletao vei zhe hai tounü sha sü laitoulai.”
24Oh Ramai, avei veo, nenou veiloua tayu,
ae nenou tapoa nou sheeyu ki hi talouyu sü mai hrülai nou zhingaore.
25Lou souyu maitao nou nghoujülo nou bue,
lousouyu basei poyu maitao nou thailova bue,
sühai kohinou naotu maitao nou beibei da poa nou bue.
26“Maisou vejüa buyu hinou Ramai ye paosholo;
Mapao ye paosholo khaio, Jakob vei tyaosholea maitao!”
27Rairaikai soua taikayu Benjamin maitao nou veloue,
süthaisü Judah hi süthai-apei maitao nou puletao vei me sa-a nou taloue,
puletaoye thaifü poa nou Zebulun ae Naphtali hi süthai-apei maitao nou veloue.
28Oh Ramai, nevei khouko nasü popa ngaopeio,
Etao thaosoua raichoki nevei khouko nou soupeikhai touyu nasü ngaopeio, Oh Ramai.
29Jerusalem hinou buyu nevei Rathoki donou veo maitao nou ne hi sapeina khesü pove peie.
30Rekhaona zhai büa buyu Ejipt ye chaa peio;
tyahrütao, chokhome hi buyu chodetao ae chotoutu noupu chaa peio.
Seihla thainüa buyu mai hrülaiye sü phi nou taidei sasa khaipeio,
soureih souyu jüpa-a buyu mai hrülaiye sü hupho rarou khaipeio.
31Sühseita maitao hai Ejipt hinou ve loulai;
Ethiopia maitao nou Ramai hi bah lapoa nou veachi paolai.
32Ramai ye lou sousholo, deiphao hi buyu vedeitao,
Mapao ye lou sousho khaio,
33raichoki nou buyu ratei vanou rhei pfüa tayu puh hisü!
Keilo, shura soua nou ra-a buyu puhvei pei nasü.
34Ramai vei khouko sü shapao peikhaio;
puhvei aduso sü Israel mai hi bue,
puhvei khouchi sü ratei vanou bue.
35Ramai hai puhvei sheeyu ki hinou tapayu phaki
daizhou koute ngaokhupa-e—
Israel maivei Ramai hai!
Puhnou puhvei maitao hi pfüchi ae khouko sü peie.
Ramai ye Paosholo!
Currently Selected:
LOUTAO 68: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
