LOUTAO 69
69
Kra-a nou Soukha Khoyu
1Oh Ramai, Eye khailupa peio!
Dzü nou angu hisü khe loure.
2Esü thoushoa buyu konai hinou füloure,
ae aphi tailoure buh ali-a hare;
Esü dzü thouyu hisü loure,
ae dzü nou Eye sü maolou laire.
3Eye soukha peio tea kuyu donou Esü shaloure,
ae araoqulu sü thekei lure.
Nevei soukha peiyu nasü vuzhi-a buyu donou anghithou sü ha zhuthou louhore.
4Qo ha-a nou Eye ngaorayu maitao hai avei peishupo jünou pou loure.
Eye ngaobayu maitao nou apei hi mah dukakhai peie;
puletao hai khoushoe ae Eye southa nüsho-a bure.
Enou halia vaolou moyuma Eye vaoloure tea natao sü panou peidakhaire.
5Oh Ramai, Esü vava-a nou bubaie touyu sü nenou süwe.
Avei mahmo khesü ne nghoujü pokukhai moe.
6Khoukhoulai Ramai Mapao, Eye donou neye louche-a buyu maitaoye sü panou hraongu ngaoso!
Avanou neye tho-a buyu maitaoye sü panou pah shiyu sü ngaoso,
Oh Israel maivei Ramai!
7Neye donou Esü maichi mairao sü toua bure,
ae hraongu sü Enou pfüa nou bure.
8Esü athaihou jürai maitao hinou shetumai ali büa baire,
ae akikha mai hia Esü vakou mai ali büa bure.
9Nevei Rathoki nasü leshiyu sünou ale hisü mei nou rou soure;
ae ne pei hi mainou rao-a paoshiyu khesü apei hi vere.
10Enou lüh-a nou nataiyu hrü hinou hrüa bue,
ae maikhe mainou Eye ngaohi-a paoshire;
11Enou dopfüa laiyu vei sabanü banoua bukhaie,
puletao nou Eye sü konüa baire.
12Eye sü puletao nou paoshi-a nou lai-a baire,
ae zhaoh sozhia buyu maitao-a avanou lou sü dapalou soua bubaire.
13Ana Ewo louzü, ne hi veachi pao-a nou bua bailai, Mapao;
Oh Ramai, nenou jüpayu teile hisü nou Eye chila peio.
Nevei leshi zhuvea hinou Eye chila peio,
daiolouzü nenou Eye khailupa peilai tea apaokhai toue.
14Eye panou süh/konaita hi leilouta more donou khailupa peio,
Eye ngaobayu maitao hinou vupa peio,
ae dzü thoushoyu hisünou khailupa peio.
15Dzüdu nasü panou ahi vepeiso;
Eye panou zaidzü hinou maothaso moyuma khü hisü delou peiso.
16Oh Mapaowo, nevei tobai soumoa leshi peiyu hisünou avei veachi keinou peio;
nevei dushoa buyu zhuvea leshi hisünou ahilo reidakhai vepeio!
17Nevei kilai ahinou ne zhu sü pfüku peiso;
Esü veaho shoa nou bure— chunou avei akho nasü keipeio.
18Ahi tave peio ae Eye khailupa peio;
ngaobayu maitao hinou Eye vupa peio.
19Eye ngaohi-a nou konü peiyu,
hraongu soupeiyu ae ngaophou moyu khesü nenou süwe;
Eye ngaobayu mai hrülai-a nenou süwe.
20Hraongu soupeiyu sünou alüthou sü souphewure,
ae Esü veahore.
Zhuvea leshi peiyu nasü Enou vuzhi-e, ana mailia hare;
sousava peishulai tea Enou kho-e, ana mailia ngaolou more.
21E houzüa laiyu phaki, puletao nou Eye sü maiye shuthayu pou nou thouloua nou peie;
E rei-a nou laiyu phaki, puletao nou Eye sü khashoyu dzü nou peie.
22Puletao nou tovai zhoa buyu nasü panou puletaoye haka tayu sü soupeio;
puletao nou khonüh nüa buyu nasü panou puletaoye kaodouyu sü southeo.
23Puletao vei nghithou sü soucha peio!
Puletao vei khya sü teisa panou lülou hoyu sü soupeio.
24Nevei lekha rarou sünou puletao hi lakou peio,
nevei chaa sü puletao pei hi vepeio.
25Puletao vei fühao khesü panou thaokhaiwua tayu sü soupeio,
puletao vei sahpao hisü mailia panou hrüa buyu sü soupeiso.
26Nenou tudee peikhai toua buyu maitaoye sü puletao nou souvea souchoro peipua nou bure;
nenou zhipei khaitoua buyu maitao vei veahoyu khesü puletao nou chipha poa nou bua baire.
27Puletao vei mahmo veishi sü litou touloua khaipeio.
Nevei khailupa peiyu hisü puletaoye panou titoulia ngaolouyu sü soupeiso.
28Puletao vei zhih sü nevei hriyu larübvü hinou souha peio;
nevei maitao zhih rüyu hisü puletao vei zhih sü rüthou peiso.
29Ana Ewo louzü soure ae veashore;
Eye polashu peio, Oh Ramai, ae Eye khailupa peio!
30Enou Ramai ye sü lou nou sousholai;
Enou puhvei aduso nasü kalo paoyu noupu shapao peilai.
31Haibüyu nasü nou Mapao ye kikhaorü ae dushoyu chode nou posheela peiyu jünou puhnou jüpapu laihie.
32Mainou souvea souho-a buyu maitao nou hainasü ngaolouyu phaki,
puletao hai lesa sholai;
Ramai ye tho-a buyu maitaoye sü le souhro peipulai.
33Touha sohayu maitao vei veachi sü Ramai nou keipeiwe,
ae hukhaki hinou buyu puhvei maitaoye sü puhnou ngaipei moe.
34Raki ae deiphao, zaitao ae sühinou buyu hrikhaona hrülai,
Ramai ye paosholo.
35Puhnou Jerusalem sü khailupa peilai ae Judah vei nuhdutao hai soushu dakhai peilai.
36Puhvei kilai maitao vei tyaosholea maitao nou süsü kikaa soua thaoloulai,
ae puhye leshiyu maitao nou sühisü hrülai.
Currently Selected:
LOUTAO 69: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
