LOUTAO 66
66
Paoshoyu ae Kalo Paoyu Lou
1Deiphao mai hrülai, Ramai ye shusou asa-a paosholo!
2Puhvei zhih aveih nasü lou nou soushokhaio;
puhvei kathe khesü paosho peio.
3Ramai hi haibüa paokhaio, “Nenou soupfüyu vah haso khesü daizhou koute khupa-e!
Nevei khouko hai duleyu donou neye ngaobayu maitao koute-a pi-hi poa nou neye khurüwe.
4Deiphao mai hrülai nou neye thowe;
puletao nou neye sü lou soushowe,
puletao nou nevei zhih sü lou nou soushowe.”
5Ramai nou soupeikhai touyu vahtao,
ae deiphao mai hi khupayu vah haso soupfü peikhai touyu khesü tave zhukhaio.
6Puhnou zaidu nasü dei theyu hi soudapa peie,
Etao puopaoh maitaoye panou reidu sü phi nou kacho paloue.
Puhnou soupeikhai touyu vah haso donou Etao nou lesa-e.
7Puhnou teisa nou puhvei khouko sünou khasa-a hrüe,
ae puhnou tyahrütaoye sü zhupoa nou bue.
Khaitya-a puhye duyu maiye panou veilouyu sü soupeiso.
8Deiphao mai hrülai, Etao Ramai ye paosholo;
neletao nou puhye paoshoyu pai sü panou choukhaio.
9Puh nou Etaoye sü panou hria nou bupeie,
ae Etaoye panou kaoduta moe.
10Oh Ramai, nenou Etaoye shahu hai
pothou mei deia zhuyu büa zhupeie.
11Nenou Etaoye panou sho-rü hisü deloue,
ae Etaoye panou koupo sühsho-a pfüe.
12Ngaobayu maitaoye panou Etaoye taidei peie;
Etaoye panou mei alia dzü hinou ta-e,
ana nenou chuo Etaoye sü kaonayu buh hi save khaipeie.
13Enou meidei-a posheela peiyu khesü nevei ki hi pove peilai;
Enou apaokhai touyu thaifüa neye posheela peilai.
14Enou veahoa buyu phaki, ne hi soupeilai tea amü nou paokhai touyu khesü souvete peilai.
15Posheelabu hinou meidei-a posheelare donou Enou zhaotu khesü pove peilai,
Enou chode ae nghitu khesü pove sheela peilai,
sübüa meideia posheelayu meikhao nasü panou rakiva khaokhelai.
16Ramai ye khuhao-a buyu mai hrülai, taveloua nou kei khaio,
Ramai nou ahi dai-e soupei khaitoue touyu khesü Enou neletao hi paongao peilai.
17Enou kra-a puh hinou soukha peio tea kho-e;
Enou puhye sü lou sousho-e.
18Hakinou Enou avei mahmo khesü poku khaitoua bure toulouzü,
Enou khoyu khesü Mapao nou keinou peilai moe.
19Ana Enou veachi paoyu khesü Ramai nou kei noupeie.
20Enou Ramai ye sü paoshowe,
daiolouzü puhnou avei veachi sü keipei bamoe,
moyuma puhvei tobai soumoa leshi zhuvea peiyu nasü ahinou povai pota peimoe.
Currently Selected:
LOUTAO 66: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
