LOUTAO 59
59
Kaozhou Ashi Daomore donou Veachi Paoyu
1Oh avei Ramai, Eye ngaobayu
maitao hinou Eye khailupa peio,
Eye dua laiyu maitao hinou Eye vupa peio.
2Maishi maitao bah hinou Eye popa peio;
maiye southayu maitao hinou Eye vupa peio.
3Zhukhaio, puletao nou Eye southare donou da-a bure,
zhaipou shiyu maitao nou Eye soushire donou tave meime soua buloure.
Puletao nou haibüa souyu hai Enou soumah pfümah khaitouyu donou moe,
4moyuma puletao nou haibüa thashoa nou tupove souda-a buyu hai,
Oh Mapaowo, Enou mahmo soukhai touyu donou moe.
5Khoukhoulai Ramai Mapao, tashulo, ae tave Eye soukha peio;
Israel maivei Ramai, hai khesü ne lah zhukhaio!
cheche moyu rataoye tho-a buyu maitaoye sü tudee peio.
Maishi maitaoye sü zhuvea peiso.
6Puletao hai teimai loukhai-e dakhai vewe,
ae puletao hai sei büa daopoa nou nuhdu hisü takou takhe-a laiwe.
7Puletao nou chi la ashi paoyu ae pirayu khesü kei khaio.
Puletao vei mali hai khoche büa bue,
anou puletaoye mai linoua süpai moe tea puletao hai lah tsücho-a bue.
8Ana Oh Mapaowo, nenou puletaoye sü konüe,
nenou cheche moyu rataoye tho-a buyu maitaoye sü jünü peiwe.
9Oh Ramai, Enou nevei khouchi nasü louchewe;
ne hai avei baibuh nasüe.
10Avei Ramai nou puhvei zhuvea leshi hinou ahi velai,
Eye ngaoba-a buyu maitao nou haka tayu sü puhnou Eye panou ngaoloulai.
11Oh Ramai, avei maitaoye panou licho loure donou puletaoye southa peiso.
Nevei khouko nou puletaoye sü soupho rarou laikhai peio ae hraongu soupeio.
Oh Mapaowo, Etaoye vupa-apeio.
12Puletao vei mü hinou paopayu mah,
ae puletao vei mütai hinou paopayu chipaotao;
puletaoye khaophu souyu sho-rü hinou pa mulouyu sü soupeio!
Puletao nou maiye chaayu ae dahühüa laiyu donou.
13Nevei lekha rarou hisünou puletaoye souha peio,
puletaoye sü souhakhai toupeio.
Süthaisü Ramai nou Israel maiye khasa-a nou hrüwe,
ae teideiphao teitei-a puhnou khasa-a nou bue touyu hai mai hrülai nou süloulai.
14Eye ngaobayu maitao nou koukhe loukhai-e dakhai vewe,
ae puletao hai sei büa ngirapoa nou nuhdu hisü tasühao-a laiwe,
15puletao hai sei büa tahao poa nou touso sü phouwe,
ae puletao nou pou phou reikhayu sü ngaolou mokhaie kheimathe sü rapoa nou laiwe.
16Ana Ewo louzü nevei khouko nasü lou soushoa nou bulai,
ae shona chüsü Enou nevei tobai soumoa leshi peiyu nasü shusoua lou soulai.
Daiolouzü nenou avei baibu nasü soupeie,
ae veaho vedao-a buyu phaki-a ne hinou Eye sü panou baichaoloue.
17Eye vupa-apeio, Enou neye paosholai.
Daiolouzü Oh Ramai, ne hai avei baibu nasüe,
ae Eye tobai soumoa leshi peie.
Currently Selected:
LOUTAO 59: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
