LOUTAO 58
58
Ashi Maiye Tudee peio tea Ramai hi Veachi Paoyu
1Nuh teidei kho-a buyu maitao,
acheche hinou neletao vei chidei nasü soupei homoe?
Neletao nou mai hrülai hi raibütoua chilou khesü kupei moge?
2Neletao nou sükua soumoe!
Neletao hai vah ashi soure donou tsü cho-a bubaire,
ae teidei hisü panou taida-a bure donou soupei-a baie.
3Mai ashi maitao hai puletao vei hrümamai teitei nou kaozü moyu hisü ta-a baiwe,
puletaoye na louyu teithe hinou dayu chi paopoa ta-a baiwe.
4Puletao hai nghou tushi büa maiye shuthayu pou shi nou phoufüa bue,
puletao hai nyou peyu nghouvu büa puletao vei nyou sü kapoa nou bue,
5südonou nghou seijüyu maivei paikho nasü chou more,
ae kheikhupado soulou süyu maitao vei paila aveih khesü chou more.
6Oh Ramai, zhaipou shishoa buyu khaosouveo haitao vei huh sü dasha peio.
7Puletaoye sü panou dzü kütayu büa hakata-o,
ludu hinou poube buyu khesü mainou headeipoa tayu büa puletaoye sü deisasa peio.
8Khanobvü nou leita loua ngaomo tayu büa puletaoye sü panou ngaomo ta-o,
thai-a nou nah nakouyu nahtou ali nou teinghei ngaokhai moyu büa puletaoye sü panou teinghei ava ngaoso.
9Poube phailaiyu büa puletao nou sülumo jünou puletao sü souha-a bailai,
puletao hai hria buyu teile hinou Ramai vei lekha rarou sünou houlai bailai.
10Cheche maitao nou mahmo soua buyu maitaoye tudee peiyu sü ngaolouyu phaki puletao hai asalai,
mai ashi maitao vei zhe hinou puletao hai phi taipoa talai.
11Maikhe mainou haibüa paolai,
“Cheche vuzünou acheche maiye sü buu peiwe;
deiphao maiye chiku peiyu Ramai ali bue.”
Currently Selected:
LOUTAO 58: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
