LOUTAO 56
56
Ramai ye Louche-a Veachi Paoyu
1Oh Ramai, Eye zhuvea peio,
daiolouzü Eye sü mainou dukoute-a baire;
ngaobayu maitao nou Eye sü souvea souchoro pei koute-a bubaire.
2Eye sü ngaoba maitao nou taidei sasa khaiwulai tea bukoute-a baire.
Eye soureih souyu mai hai alao soumoa buloure.
3Khoukhoulai Mapaowo, Enou ngaopiyu phaki,
Enou neye sü lülouchewe.
4Enou Ramai ye lülouchewe ae ngaopiyu sü ha-e;
puhnou apaopei khaitouyu donou Enou puhye paoshowe.
Kezhe pfüyu mai ali nou Eye dai soupei lousüe?
5Eye ngaobayu maitao nou teithetsü Eye souvea peia bue,
puletao nou Eye soushi peilai tea teile busasü tsüchoda-a laiwe.
6Puletao nou Eye southalai tea tutsüloua nou Eye dakou dakhe-a laiwe.
7Oh Ramai, puletao nou vah ashi souyu thaifüa puletaoye sü tudee peio,
nevei lekha rarou hisü nou puletaoye sü soukanghi peio.
8Enou daizhou koute veaho-a nou bue touyu sü nenou süwe,
Enou ngheidzü kouyu khesü nenou ngaowe.
Sükhesü nevei larübvü hi rüthou khaitou movu?
9Enou neye kuyu phaki,
avei ngaoba maitao hai tukhaita bailai.
Enou hai nasü süwe, süolouzü Ramai nou Eye thaiko peilai.
10Ramai Mapao nou paohpei khaitouyu donou Enou puhye sü paoshowe.
11Enou puhye sü louchewe, ae haliro Enou ngaopi laimoe.
Kezhe pfüyu mai ali nou Eye dai soupeilou süyu buge?
12Oh Ramai, Enou apaokhai touyu thaifüa neye posheela peilai,
Enou neye kalo paoyu nasü avei posheela soua ne hi popeilai,
13daiolouzü nenou Eye athai hinou khailupa peie,
ae Eye panou hraongu nasü ngaomoe.
Südonou Ramai vei nghoujü hinou,
hria buyu maitaoye ava va peiyu buh hinou Enou talai.
Currently Selected:
LOUTAO 56: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
