LOUTAO 55
55
Khamai Samai nou Thao-a Tayu Maivei Veachi
1Oh Ramai, Enou veachi paoyu sü keinou peio;
Eye zhuvea peio tea khoyu hinou tavai tapeiso!
2Enou paoyu keinou peio, ae Eye chila peio;
E leveayu donou lülou hore.
3Eye ngaobayu maitao nou pira-a buyu sü E ngaopire,
puletao nou do ashi sünou Eye sü souchoro sho-a nou bure.
Puletao nou veahoyu sü apei hi pove peie;
puletao hai ahi rarou shopoa nou Eye ngaora sho-a nou bure.
4Esü ngaopi sho-a nou bu baire,
ae thaiyu sü ngaopi shoa nou bure.
5E ngaopi shoa nou shirürüa bu baire;
pei hiyu sünou ahi phoutao loure.
6E hai raohou büa shou bushe touyu thaio veilaire.
Enou zhaopoa taho soyu sü ngaoloulai.
7Enou ka doushoa buyu buh hisü zhaota bailai,
ae mai hazei touyu vaohro hinou hrüta bailai.
8Teikhai teirü ashi veyu phaki Enou thasho-a turei taloua nou baibu sü phoulou bailai.
9Oh Mapaowo, Eye ngaoba-a buyu maitao vei tsüle sü souhao khaipeio!
Enou nuhdu hisü taidayu ae büroyu sü ngao-e,
10hea-khei sümoa mahmo souyu,
ae veahoyu sünou sühisü sühao poa nou bue.
11Buhliki hai soushi soukayu khaikho baire,
duva veishi hisü dayu ae souchoroyu nou phoutao loure.
12Eye ngaoba zhubayu mai ali nou Eye konüa buyu thaio,
süsü Enou heamea lou süe;
Eye hrai-a ngaorayu mai ali nou khaophu soua buyu thaio,
Enou puh nghoujü nou tutsüta-a bailai.
13Ana sünasü nenou baie, avei khamai nou baie,
Eye koa toutou sosoyu samai nou baie.
14Puh sü Eye koa chiveih chishi phakuwe ae Rathoki hinou koa ratho zho-a laiwe.
15Eye ngaobayu maitaoye panou hü chemoa thai theo;
puletaoye sü panou hria nou athai maivei teidei hisü hotawo!
Ashi nou puletao vei ki hi ae tsüle hisü bu baiwe.
16Ana Enou Ramai Mapao hi soukha peio tea kho-e,
ae puhnou Eye khailupa peilai.
17Enou shona, hea ae khei mathe avei veahoyu ae dopfüa laiyu nasü puh hi chouveyu phaki puhnou avei pai sü keinou peilai.
18Eye ngaoba-a buyu maitaoye soureih soua buyu reihbu hinou puhnou Eye kaozhou ashi panou daomoa sa-a dakhai vepeilai.
19Teisa nou khasa-a hrüre Ramai nou avei veachi khesü keinou peilai,
ae puletaoye sü pada peilai,
daiolouzü puletao hai ledayu sü ha-e,
ae puletao nou Ramai ye pi moe.
20Raichoki avei samai nanou puhvei samaitaoye zhuba-a hraitare;
puhnou chaachou soukhai touyu nasü pfüphere.
21Puhvei chipao lako hai laivoudzü jünou jüpu hie,
ana puhvei tsüle hiolouzü ngaorayu nou phoutao-a bubaie;
puhvei chipao khesü theadzü nakhai touyu büe,
ana sütao nou khoche hei veiyu büa maiye zhizhu peiwe.
22Nevei veahoyu khesü Mapao vei bah hi thaothou-o,
sükulouzü puhnou neye vupa peilai;
tsüle sheesha touyu maiye sü panou hraongu daokhailai moe.
23Ana Oh Ramai, nenou maiye southayu maitao,
ae daruyu maitaoye sü panou hü hrüchemoa khü hi pothou khaipei bailai.
Anou Ewo louzü neye louche-a bulai.
Currently Selected:
LOUTAO 55: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
