LOUTAO 52
52
Dayu Maitaoye Ramai nou Chikure
1Aduso maitaore, neletao vei
ashi hisünou daidonou neletao hai khaophu sü souwe?
Ramai vei chilee checheyu hai-o akhai ha-e.
2Neletao hai maiye soushire donou tsüchoda-a bubaiwe;
neletao vei mali hai kaiti heivei shoyu ali büe,
teile busasü dakhokho-a lai baie.
3Neletao hai aveih na jünou ashi naye leshipure,
ae checheyu na jünou dayu na-a jüpa pure.
4Dayu maitaore, neletao hai neletao vei chipao lako nasü nou maiye zhizhu peiyu hai jüpawe!
5Südonou neletaoye sü Ramai nou teisa nou souha khailai;
puhnou neletaoye sü neletao vei ki hinou süthai paloua paide paisasa khaiwulai;
ae neletaoye hriyu maivei teidei hinou polaiwulai.
6Acheche maitao nou haisü ngaoloua ngaopilai,
süthaisü puletao nou neletaoye konüa haibüa paolai,
7“Zhukhaio, Ramai ye louche moa lah puhvei kinangi taoye
loucheyu ae vah ashi souyu hinou baibu soua buyu mai nasü hainare.”
8Ana Ewo louzü Ramai vei ki hinou paopayu oliv süübe büwe;
Enou Ramai vei tobai soumoa leshi peiyu nasü teisa nou louchewe.
9Ramai, Enou neye sü teisa nou paosholai,
daiolouzü nenou soupeilai touyu vah hasotao donou;
nevei maitao vejüa buyu hrohinou Enou nevei aveih nasü shapaolai.
Currently Selected:
LOUTAO 52: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
