LOUTAO 51
51
Mah Khaipeio tea Veachi Paoyu
1Oh Ramai, nevei tobai soumoa
leshi peiyu nasü nou Eye zhuvea peio.
Nevei dushoa buyu zhuvea leshi hisünou avei mah veishi sü khaipeio!
2Avei tsüle ashi teitei sü khüshee peio ae avei mahmo khesü soushee peio.
3Avei kaozü moyu nasü Enou süwe;
avei mahmo khesü tobai soumoa anghoujü hinou bue.
4Enou nevei ngheingao hinou mahmo khesü soukoute-a bure,
ae ne nghoujü nou vah ashi khesü soupfüwure.
Südonou nenou Eye tudeeyu hai kao-a baie,
ae nenou Eye paoshiyu hai zü baie.
5E hai mah ae ashi nasü soua nou nakou peia baie;
ae apfü pou hinou Esü mahmo soua hrükou baie.
6Chili checheyu nasü nenou jüpa-e;
nevei ratsü nasü avei tsüle hi thoukhai peio.
7Avei mahmo khesü polai peio,
sükulouzü E hai sheesha tea bailai;
Eye dzü khü peio, ae Esü vüra jünou kaapua bailai.
8Eye panou savayu kho khesü choulo;
sükulouzü nenou Eye souphe soupho sasa-a khaitoua buyuma Enou savayu sü ngaopu lousüe.
9Avei mahtao hinou nevei ngheithou sü pfüvai peio,
ae avei ashi teitei sü souha peio.
10Oh Ramai, sheesha touyu lüthou ali Eye soupeio,
ae tsüle ashu ae nevei khakhe hinou hrülou süyu rako ali Eye peio.
11Eye nevei nghoujü hinou hulai peiso;
ae nevei sheeyu rako nasü ahinou pota peiso.
12Nevei khailu peiyu asah nasü Eye peipulaiwo,
ae Eye panou ne chi zünüsho-a zülo.
13Süthaisü Enou mahmo souyu maitao hi nevei chikha khesü doupeilai,
ae puletao nou ne hisü dakhai velai.
14Eye khailupa peio, Oh Ramai, avei hrümamai sü vupa peio,
ae Enou nevei acheche nasü shusoua shapaolai.
15 Mapaowo, Eye chi paoloure donou soukha peio,
ae Enou neye sü paosholai.
16Daiolouzü ne hai posheela peiyu khesü jüpa moe,
Enou neye mei dei-a posheela peiyuma nenou sükhesü thainülai moe.
17Oh Ramai, Enou tainou souyu rako sünou neye posheela peiwe;
le pepoyu ae leda louyu lüthou hai nenou ngaora laimoe.
18Oh Ramai, Zion ye sü zhuvea nou soukha peio,
pepota-a buyu Jerusalem kivo khesü soushu dakhai peio.
19Süthaisü kaozü hinou posheela peiyu,
ae nenou jüpayu hinou meidei-a sheela peiyutao,
ae chode khesü nevei posheelabu hinou poa sheela peilai.
Currently Selected:
LOUTAO 51: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
