LOUTAO 50
50
Cheche-a Rathoyu
1Khoukhoulai Ramai Mapao nou paowe;
puhnou teinghei palova nou poa teinghei loulova koute hinou hrüa buyu maitaoye kua bue.
2Zion nuhdu hisünou Ramai vei hüveiyu,
ae chekhoyu nasü varoua nou bue.
3Etao Ramai hai velaire, ana nasei-a velai moe;
puh nghoujü hinou mei sü taotutu poa nou ae puhvei pehao veishi hisü teikhai teirü ashi sünou sühao poa velai.
4Puhnou puhvei maitaoye chikuyu sü takou zhupeia shaki soupeio tea raki ae deiphao sü kuwe.
5Puhnou paoe, “Eye koa posheela peiyu sünou vo soukhai touyu maitao,
ae chilee cheche-a buyu avei maitaoye sü ahi save jüpeio.”
6Raki nou Ramai hai cheche-e tea paopa peiwe,
daiolouzü Ramai puhnou chiku-apeio nasü baie.
7“Oh avei maitaore, Enou paoyu chi keilo;
Israel maitao, Enou ne pei hisü aetounü moyu chi paolai.
E hai Ramai-e, neletao vei Ramai nasüe.
8Neletao nou Eye posheela peiyu donou vamoa E neletaoye zümoe;
neletao nou mei dei-a posheela peiyu nasü tobai soumoa soupeiwe.
9Enou neletao vei chokhome hinou chodetao moyuma zhaotume hinou zhaotu khesü E jüpa moe;
10vaohro hinou buyu soukhaona teitei ae deichi thethe hinou hrüyu kikhaorü veishi sü avei khaitou baie.
11Ratei hinou zhaoh-a buyu raohou teitei,
ae deiphi hinou lüa buyu veishi sü avei baie.
12“Enou houzüa bure touyuma, Eye touso peio tea neletao hinou kholai moe,
daiolouzü teideiphao ae sühinou buyu na veishi hai avei baie.
13E chode sou sü touvu moyuma zhaotu zhe kewu?
14Neletao nou kalo paoyu sünanou Ramai hi posheela sü soupeio,
ae neletao nou soulai tea chaachou soukhai touyu puhsü
Kukulai nahi cheche-a souvete peio.
15Neletao hi veahoyu veyu phaki Eye kulo;
Enou neletaoye khailupa peilai,
ae neletao nou Eye paosholai.”
16Ana Ramai nou maishi mai hi haibüa paoe,
“Neletao kabüa nou avei chikha khesü phouwe?
Kabüa avei Vo vanou phaku khaige?
17Neletao hai Enou tudee-a souzü peiyu nasü poba-e,
ae avei chikha khesü züba-a thaokhaire.
18Neletao hai vaoyu mai aliye daolouyu phaki puhye koa sa-a tare,
ae khulou souyu maiye samai khamai soutare.
19“Neletao hai teisa nou chi la ashi paore donou souda-a bu baiwe,
alia piyu ae hraoyu halia ha-a nou neletao hai chaochao soua dachi pao baiwe.
20Neletao hai lah neletao vei thaihou jürai maitao koute-a paoshi pei baie,
ae puletao vei mah khesü phoupa peilai tea lai-a baiwe.
21Neletao nou vah haibüyu khesü souwe,
ae Enou chi lia paomoa bupeie,
südonou neletao hai E-a neletaoye raibü baie tea tsü choloure.
Ana chuo Enou neletaoye sü züvei talai,
ae neletaoye souzüpei talaire.
22“Eye thao-ngai-a tayu maitaore, haisü keilo,
molouzü Enou neletaoye sü souhawu bailai,
ae mai linoua neletaoye sü khailupa peilou hoe.
23Kalo paoyu hai Eye tsükhou-a posheela peiyu nasüe,
ae achi züyu mai hrülaiye sü Enou khailupa peivu zülai.”
Currently Selected:
LOUTAO 50: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
