LOUTAO 49
49
Vavayu donou Kinitaoye Loucheyu
1Deiphao mai hrülai, hai hai sülo!
Hai sü kei noulo, buh likinou hrüa buyu maitaore,
2tai-du ae toungi touha sümoa
mai hrülai nou hai sü keinoulo.
3Avei mü hinou ratsü khesü raopalai,
ae Enou tsüchoyu hai sheesha baie.
4Enou tsüchi khesü keinoulai;
Enou lanabvü sü ka-a nada ko khesü paopeilai.
5Ngaoba maitao nou Eye sühaoloua kaozhou shishoa buyuma Enou ngaopi laimoe,
6toungi shoa buyu maitao,
ae puletao vei kini vanou khaophu soua laiyu maitaoye sü Enou pilai moe.
7Mai ali koute-a lah nou lahye khailupa louhoe;
puhnou puhvei hrümamai muh hai Ramai hi khapei louhoe,
8daiolouzü mai ali vei hrümai muh hai teishoe.
Puhnou hasou kilia muhma nou peia
9khü hi lou more donou,
ae teisa hriloure donou khapei louhoe.
10Mai hrülai nou ngaowe, süolouzü hasüyu mai-a,
voyu mai-a ae vavayu na-a thaita khai-a baiwe.
Puletao mai hrülai nou puletao vei nangi khesü puletao vei toudzü hi khaidai-a ta baiwe.
11Puletao hria bukio teidei taoli hai lah puletao vei soua nou bue,
anou chuo khü nanou teisa puletao ki soulaire,
sühinou puletao hai teisa nou bua bailai.
12Dusoyu mai koute-a athai hisü nou tureipa louhoe,
soukhaona ali bütoua puletao hai thaita bailai.
13Lahye louche-a buyu maitao hisü dai-e vepawe touyu sü zhukhaio,
lah vei kini buyu khesü ngaoloua rukha-a nou savashoa buyu maitaoye sü zhukhaio—
14puletao hai zhaotu ali büa thai bailai,
ae Athai touyu nanou puletao vei zhaokhopu soulai.
Acheche mai nou puletao jünou veiloulai,
puletao vei ki jünou dousho-a buyu athai maivei teidei hi hotayu phaki,
puletao vei pfüphao hai thasho-a nou nai vita bailai.
15Ana Ramai nou Eye vupa peilai,
puhnou Eye athai vei khouko hinou khailupa peilai.
16Mai ali nou toungi payu phaki,
puhvei kini khesü pousho pare tea leveaso,
17sükhesü puhnou thaitayu phaki pfüta louhoe;
puhvei nangi khesü puhye koa khü hi louta laimoe.
18Mai ali hai puhvei hrümai hinou savashoa buyuma,
ae puhnou veilouyu donou mainou puhye paosho-a buyuma,
19puhvei paipaoh maitao büa puh-a thaita bailai,
ae puhnou ava nasü ngaopulou laimoe.
20Dusoyu mai koute-a athai hisü nou tureipa louhoe,
soukhaona ali bütoua puh-a thai bailai.
Currently Selected:
LOUTAO 49: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
