LOUTAO 44
44
Vupa Peire donou Veachi Paoyu
1Oh Ramai, raichoki nenou Etao
vei poupaoh maitao hi soupfü peikhai touyu vah haso khesü,
puletao nou Etao hi paongao peiyu hai Etao nou vuzünou choure.
2Nenou kabüa cheche moyu rahtaoye tho-a buyu tyahrütaoye hulai peie,
ae nevei maitaoye puletao vei teidei hinou soushu peie touyu;
kabüa tyahrü kukhetaoye nenou tudee peiyu ae nevei maitaoye sousava peiyu khesü Etao nou choue.
3Nevei maitao hai puletao vei teidei sü khoche nou poa kolou moe,
puletao nou soureih veilouyu hai lah puletao vei khouko vanou moe;
ana nevei khoukho, ae nevei pfüchi,
ae nenou kozho peia salai peiyu donou baie,
daiolouzü nenou puletaoye sü leshi peie.
4Ne hai avei veo süe ae avei Ramai nasüe,
nenou nevei maitaoye veilou ngalouyu nasü peie.
5Nevei khouko vanou Etaoye ngaobayu maitaoye sü Etao nou soukanghei peie.
6Enou avei voulou nasü louche moe,
moyuma avei khoche nou Eye khailupa peilou hoe.
7Ana nenou Etaoye sü ngaobayu maitao hinou khailupa peie,
ae Etaoye ngaorayu maitaoye sü soukanghi peie.
8Ramai zhih hinou Etao nou khaophu soua bukou telai,
ae neye paosho-a kalo sü teisa nou pao koute-a bulai.
9Ana nenou chuo Etaoye laire,
ae Etaoye sü panou hraongu ngao-a bure;
nenou Etao vei reihmai meye sü koa tapei more.
10Nenou Etaoye sü panou ngaobayu maitao nghoujü nou tutare,
ae puletaoye panou Etao vei na buyu veishi sü poloure.
11Nenou Etaoye sü zhaotu dathayu büa panou dathawure;
ae Etaoye soura rouposhu vakou maivei teidei veishi hi khaipeie.
12Muh lia hayu na ali büa nevei maitaoye sü nenou muh lapa-a nou zholaiwure.
13Nenou Etao hi soupeikhai touyu vah khesü Etao vei kinapa maitao nou ngaoloua Etaoye konüa bure.
14Etaoye sü nenou tyahrü kukhe maivei jünü soupeire.
Puletao nou Etaoye sü konüa puletao vei pei ngu-a nou bure.
15Esü pah veimoa bukoute-a baire,
ae hraongu nou Eye holoure,
16daiolouzü Eye ngaobayu maitao nou konüa Eye paoshiyu khesü choulouyu donou.
17Etao nou neye ngaimoa bulukhu,
moyuma nevei Vo nasü pfüthomoa buyuma haibüyu teitei sü Etao hi vepa-a nou bure.
18Etao nou neye louche moyu sü soumoe,
Etao nou nevei chikha khesü züba moe.
19Ana nenou Etaoye panou souloure khouko ali-a hazei teanou rekhaona hrohi khaipeiwure;
nenou Etaoye sü zhitei touyu buh hi thoukhai peiwure.
20Etao nou Ramai ye thoyu sü thaowua vakou maivei rah hi veachi paotayu thaio,
21nenou süsü phoupalou vuzüa bailai,
daiolouzü Etao vei tsüle veishi sü nenou süe.
22Ana Etaoye zhaotu dathayu büa southa peikoute-a buyu haikhe teitei sü nenou süwe.
23 Mapao, kushulo! Daidonou ne zhitawe?
Tashulo! Etaoye teisa nou malai peiso!
24Daidonou ne Etao hinou tutsü tawe?
Etao nou sounou souyu ae veahoyu khesü ngaipeiso!
25Etao hai deiphi hi kaokou bure;
Etao hai veilou hoa deinai hinou kou dazüa bure.
26Etaoye tave soukha peio!
Nevei tobai soumoa leshi peiyu nou Etaoye khailupa peio!
Currently Selected:
LOUTAO 44: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
