LOUTAO 41
41
Sounou Souyu Mainou Veachi Paoyu
1Touha soha-a laiyu maiye
donou tsücho peiyu maisü vasayu mai soulai;
puletao nou veahoyu phaki, Mapao nou puletaoye sü soukha peilai.
2 Mapao nou puletaoye sü kiko peilai ae vupa peilai,
ae puhnou puletaoye sü puletaoye ngaobayu maitao bah hi thaothou peilai moe.
3Puletao nou sounou soua buyu phaki Mapao nou puletaoye sü soukha peilai
ae puhnou puletao vei sounou veishi sü souvei peilai.
4Enou paoe, “Oh Mapaowo, Eye zhuvea peio, avei sounou sü souvei peio,
daiolouzü Enou ne nghoujü nou mah souwure.”
5Ngaobayu maitao nou Eye sü paoshi-a laiwe.
Puletao nou E thaitayu ae Eye lichopu moyu nasü jüpa-e.
6Puletao hai tsüle ashi pfüa tave Eye zhuwe,
avei ko ashi pfüphou sü puletao nou pojüloua vako tapayu phaki sütao sü mai hrülai hi pao-a laiwe.
7Eye ngaorayu mai hrülai hai kheikheisoua nou achi phawe,
ae Eye soushipu peire donou tsücho-a bue.
8Puletao nou haibüa paoe, “Puh hai sounou ashi souloure;
chuo puhnou züa buyu züphao hinou kushupu louhore.”
9Enou louche kayu avei samai,
Eye koa toutou soso souyu samai koute-a chuo Eye ngaoba tare.
10Oh Mapaowo, Eye zhuvea peio,
ae Eye souvei soulashu peio,
sükulouzü Enou puletao paoh sü khapeilai.
11Haibüa soupei louzü Enou süloulai, sülouzü nenou Eye jüpawe,
daiolouzü Eye ngaobayu maitao nou ajünou veilou laimoe.
12Enou kaozü nasü souyu donou nenou Eye soukha peie,
nevei ngheingao hinou Eye teisa nou khaipeio.
13Israel maivei Ramai Mapao ye paosholo!
Puhye teisa nou paosho-a bulo!
Amen! Amen!
Currently Selected:
LOUTAO 41: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
