LOUTAO 40
40
Paoshoyu Lou
1Enou Mapao vei soukha sü heamea poa nou kho-e;
süthaisü Enou krayu avei pai sü puhnou keinou peie.
2Puhnou Eye ngaopi shoyu deibvü hinou süthaipa peie,
thailou veiyu konai hinou daopa peie.
Puhnou Eye chuhdu phaova popa khaipeie,
ae kaozhou ashi hayu buh hi popa khaipeie.
3Puhnou Eye lou ashu ali doupeie,
Etao Ramai ye soushore lou ali.
Maikhe mainou hainasü ngaolouyu phaki ngaopilai,
ae Mapao ye puletao nou louche loulai.
4Basharaye phouta moyu moyuma cheche moyu rahtaoye thomoyu maitao,
ae Mapao ye louche louyu maitao hai savayu maitao-e.
5Oh Etao Ramai Mapaowo,
nenou Etaoye donou vah alao soupeie,
neye raiyu mai ali-a ha-e!
Nenou Etaoye donou khupayu vah alaosou soupeie,
Enou sütao hai paove khaite louhoe—
sütao hai chosha louhoe!
6Posheela peiyu ae sapeina khesü nenou jüpa moe;
mei nou dei-a posheela peiyu kikhaorü ae mahmo souyu donou tea posheela peiyu khesü nenou kho moe.
Ana keinoulou süyu noubei sü ahi peie,
7südonou Enou haibüa chila peiwe, “E hai hinou bue;
Eye paodou peiyu khesü nevei chikha larübvü hinou bue.”
8Nevei leli nasü Enou jüpa shopoa nou souwe, Oh avei Ramai!
Nenou paodou peiyu khesü avei tsüle hi pothou khailoure.
9Oh Mapaowo, nevei maitao nou vejüa buyu hrohinou nenou Etaoye khailupa peiyu ko aveih nasü paongaolai.
Enou ko hai khesü thaokhai toumoa pao-a buyu sü nenou süwe.
10Enou nevei khailu-apei ko aveih nasü alekhe hinou poku khaimoe,
Enou nevei chilee checheyu ae soukha peiyu khesü mai hi pao koute-a bue.
Enou nevei chileeyu ae tobai soumoa leshiyu nasü maisou vejüa buyu buh hinou shapao peimoa zei tea bukhai toumoe.
11Oh Mapaowo, nevei zhuvea leshi peiyu nasü ahinou deraita peiso.
Nevei leshi peiyu ae chilee checheyu nasü panou Eye teisa nou kiko peiyu sü soupeio.
Soukha Khoyu Veachi
(Lou 70)
12Chosha louhoyu hashi ae veahoyu sünou Eye sühao loure,
avei mahmo khenou Eye sü phumu louyu donou Esü halia ngaolou hore.
Sütao hai avei peishu potao jünoua pouloure, südonou Esü chathai tare.
13Oh Mapaowo, Eye khailupa peio! Chunou Eye soukha peio!
14Eye southalai tea teyu mai hrülaiye sü panou hraongu ngaoyu sü soupeio,
ae puletaoye cho ha-a nou pa bürarou-a bupeio.
Enou veahoyu phaki lesa-a nou buyu maitaoye sü panou pah ashi sü ngao-a nou dakhai tapeio.
15Eye konüa laiyu maitaoye sü panou haongao-a kangheiyu sü soupeio.
16Ne hi velouyu mai hrülaiye sü panou asah soua vasayu sü soulo.
Nenou khailupa peiyu donou ne hi kalo pao-a buyu maitaoye sü panou teisa haibüa pao-a bulo,
“Mapao hai daizhou koute dusa!”
17Oh Mapaowo, Ewo lülou hore, ae touhare,
ana nenou Eye ngaipei moe.
Ne hai Eye khailu apeio ae avei Ramai-e,
thashoa nou tave Eye soukha peio!
Currently Selected:
LOUTAO 40: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
