LOUTAO 39
39
Veahoyu Mainou Mahlayu
1Enou paoe, “Avei müli ye
panou chi pao mah more donou E soutaosoua nou hrülai;
mai ashi mainou anghiki buyu phaki E chi ali koute-a raolai moe.”
2E raokhai toumoa zei tea nou bue,
veiyu chi koute-a pao moa nou bue!
Ana Enou veayu sü shipulailai-a baire,
3ae avei tsüle hisü leveayu nou phoutao-a baire.
Enou tsüchopu khaie, Esü veahopua baire;
südonou E chi noumo louhoa chinouwe:
4“Oh Mapaowo, E teile kasho-a hrükou laige?
E duki thailaie?
Avei hrümai sü dukinou kou akhai soulai touyu ahi paongao peio.”
5Daizhou koute avei hrümaitou sü jüshoa nou nenou soupeie!
Nevei nghingao hiolouzü avei hrütou hai hazhotou lia moa nou ngao baie.
Emai vei hrütou hai cheche vuzünou teikhai hüphou veyu büa baie,
6khungu ali büa hata-a baie.
Puhnou soupfükhai touyu veishi sü hamako baie;
puhnou kini pojü khaitue,
ana thaonou poloulai touyu sü puhnou sümoe.
7Süthaisü, Oh Mapaowo, Enou dai-e vuzhi-a bulaige?
Avei areih nasü ne baie.
8Avei mahmo teitei sü khaipeio,
ae voyu maiye panou Eye konü peiso.
9E chi lia rao moa nou zei tea bubai laire,
daiolouzü Enou haibüa veahoyu teitei sü nenou soupeia baie.
10Eye souveapu peiso!
Nenou Eye dapeiyu donou Esü thailaire.
11Etao nou mahmo souyu donou nenou tukha peiwe,
ae Etao nou leshi sho-a buyu nasü rüh nou toulouyu büa nenou souha peie.
Cheche vuzünou Emai vei hrütou hai teikhai hüphou tea veyu büa baie.
12Oh Mapaowo, avei veachi sü kei peio,
ae Enou krayu avei pai sü nou peio;
Enou kra-a buyu phaki tave Eye soukha peio.
Avei puopaoh maitao büa phajütouli chaosore donou nevei kishemai soua Esü ve-a baie.
13Enou tarata mojü ae hatamo jünou Eye panou teile daotouli sava-a buloure donou nevei nghithou sü ahinou pheivai peio.
Currently Selected:
LOUTAO 39: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
