LOUTAO 38
38
Veahoyu Mainou Veachi Paoyu
1Oh Mapaowo, nevei lekha rarou hinou Eye tudee peiso!
2Daiolouzü nevei voulouthou sünou avasou hi kapeiwure,
ae ne bah nou Eye keitsü loure.
3Nenou lekhayu donou avei ke-zhe teitei sü veiyu ali-a hare,
avei mah donou avei pfüphao veishi sü sounou khaibaire.
4Avei mahtao hai apei hi khetere,
sütao pfüre hai Eye donou sülere.
5Daiolouzü E voyu donou avei sou zhimü khesü tangi pare.
6E veashore, ae Eye deiphi hi dakhao kou khai peiwure;
Esü dopfüa le koute-a bua baire.
7Esü rachiyu nou mei rouyu büa bubaire,
ae Esü thaiyu laire.
8Esü lülou hore, ae veasho loure;
ale vea-a buyu donou Esü lea nou bubaire.
9Oh Mapaowo, Enou dai-e jüpawe touyu sü nenou süwe;
Enou lepoa buyu sü nenou chouwe.
10Avei lüthou sü paodoudoua bubaire, avei khouko sü hatare,
ae avei nghithou hi vayu nasü hatare.
11Avei samaitao ae kinapa maitao hai Enou soua avasou hi tangiyu buyu donou anghiki koubare;
avei kihikhamai koute-a ahinou hotare.
12Eye southalai tea phoua laiyu maitao nou Eye nüloulai tea rüh southouwe,
ae Eye soushilai tea buyu maitao nou Eye paopiwe;
puletao nou Eye soushi souhare donou thaokhai toumoa tsüchoda-a bue.
13Esü noupeyu mai ali büa choulou hore,
la hayu mai ali büa raolou hore.
14Cheche vuzünou, Esü choulou hoyu mai ali büre,
ae maiye chalou hoyu mai ali büre.
15Ana Enou neye louchewe, Oh Mapaowo;
Enou ne vu sü kho-a bue, Oh Mapaowo avei Ramai, Eye chila peio.
16Avei veahoyu donou Eye ngaobayu maitaoye panou konü peiso;
Enou kaodu tayu donou puletaoye panou khaophu souso.
17Daiolouzü Esü kaodu talaire tea bure,
ae avei sounou nasü shipu lailai-a baire.
18Enou avei mahmo khesü paopawe;
avei mah donou Esü levea shore.
19Eye ngaobayu maitao hai pfüphao-a veishore ae khouko busho loure;
kaomoyu hinou Eye ngaorayu maitao hai pousho loure.
20Aveih soupeiyu thaosü ashi nou paoh khapeiyu maitao nou Eye duloure,
daiolouzü Enou kaozü nasü soulai tea teyu donou.
21Oh Mapaowo, Eye thaongai peiso;
ahinou hota peiso, avei Ramai!
22Eye khailupa apeio Mapaowo,
thasho-a chunou Eye soukha peio!
Currently Selected:
LOUTAO 38: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
