LOUTAO 22
22
Dopfüa Krayu ae Lou Soushoyu
1Oh a Ramai, avei Ramai, ne daisounou Eye thaowure?
Ne daisounou Eye soukha peire hinou ae Enou lüa nou rayu hisü nou dousho poa tage?
2Oh a Ramai, hea tei vayu phaki, Enou neye kra-a nou ku-e,
ana nenou Eye chila pei more;
ae khei-a neye ku-e,
ana Eye panou soyu sü ngaolu moe.
3Ana neye sü Sheeyu Nasüe tea vebuh peiwure,
ae Israel mainou paosho-a buyu sü ne-e.
4Etao vei puopaoh maitao nou neye sü louche-e,
ae nenou puletaoye sü khailupa peie.
5Puletao nou neye kuloue,
ae puletao hai kaozhou ashi hisünou tarei paloue,
puletao nou neye louche-e,
ae puletaoye hraongu panou ngaomoe.
6Ana Ewo louzü mai more; shikhaongao ali baie,
mai hrülai nou Eye sü ngaora-e!
7Eye ngaoyu mai hrülai nou Eye sü konüre,
puletao vei mali sü thaipa loua ae puletao pei sü nguloua haibüa paoe,
8“Nenou Mapao ye sü louchewe,
puhnou neye daisounou khailupa peimowe?
Mapao nou neye jüpayu thaisü,
puhnou neye daisounou soukha peimowe?”
9Nenou Eye apfüpou hinou sapa peie,
ae E nahmaitou soua buki nenou Eye kiko papeie.
10Nalouyu teithe hinou Enou Eye ne hi peiwure,
ae apfü pou hinou buyu teile hinou ne hai avei Ramai.
11Ahinou dousho-a bupeiso,
daiolouzü kaozhou ashi nasü ahi nghitei-a bure,
ae mai linoua Eye soukha peire mai hare.
12Chode taoli nou sühao louyu büa Eye sü ngaoba maitao nou sühao loure,
Bashan hi soushi shoyu chodetao nou sühao louyu büa Eye sü haoloure.
13Houzüa nou rapoa laiyu khaosouveo büa puletao hai mü hepoa Eye dulai tea bure.
14Deiphi hi dzü lalaiyu büa avei khouko sü hatare.
Avei rao teitei sü kuku takhai toure,
avei lüthou hai laivoudzü phe nou voudzü zhaotayu büa hatare.
15Avei raoqulu hai naihü büa thetare,
ae avei mali hai akhou hinou taotei touloure.
Nenou Eye panou thaire donou naiphao hi khaipeiwure.
16Sei nou sühao louyu büa maishi maime ali nou Eye sü sühao loure,
puletao nou aphi bah sü pailoure.
17Avei rao veishi pa zhingaore.
Eye ngaobayu maitao nou Eye sü phetei touloure.
18Puletao nou avei sabanü khesü poloua rako zhua zhiloure.
19Oh Mapaowo, ahinou douta peiso!
Thasho-a nou tave Eye vupa peio!
20Khoche mü hinou Eye vupa peio,
seitao hinou avei hrirai khailupa peio.
21Souveotao hinou Eye vupa peio,
rekou nou buyu chodetao hinou Eye khailupa peio,
Esü halia soulou hore.
22Nenou soupeiyu vah haso khesü Enou avei maitao hi paopeilai;
puletao nou vejüa buyu hisü Enou neye paosholai.
23“Mapao vei kilai maitaore, puhye paosholo!
Jakob vei tyaosholea maitao, puhye tsükhoulo!
Israel maitaore, puhye tholo!
24Puhnou touha soha laiyu maiye ngaonghi moe,
moyuma puletao nou veahoyu nasü ngaophou moyu sou moe,
ana puletao nou khoyu khesü kei-nou peiwe.”
25Nenou soupei khaitouyu vah khesü Enou maisou vejüa buyu hinou neye paosho peilai,
neye tho-a buyu maitao nghoujü nou Enou neye peilai tea paokhai touyu posheela khesü posheela peilai.
26Touhayu maiye sü panou tounü sü touloulai,
Mapao ye phouyu maitao nou neye sü paosholai.
Puletao panou teisa nou savayu sü soulou theo.
27Tyahrü hrülai nou Mapao ye sü licholai.
Deiphao kainghou veishi hinou hrüyu mai hrülai sü puh hi dakhai velai;
tyahrü veishi nou puhye sü tholai.
28Daiolouzü Mapao nou veo nasü baie,
ae puhnou tyahrü hrülaiye sü tukha-a hrülai.
29Khaophu souyu mai hrülai nou puhye sü khurülai,
thai-a bailaiyu mai hrülai nou puhye sü nakou khurülai.
30Haithai nou hrüvere bonakha maitao-a puhvei kuvah sü soulai,
vere khaphao teitei nou Mapao vei ko sü paolai.
31Nakou moa buyu maitao hisü haibüa paolai,
“Mapao nou puhvei maitaoye khailupa peie.”
Currently Selected:
LOUTAO 22: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
