LOUTAO 19
19
Teideiphao Souyu hi Ramai vei Kathe
1Ratei nou Ramai vei kathe sü pongaowe!
Raki hi buyu teivu khenou puhvei basha khesü ngaowe.
2Zhou teitheh payu nasü nou thainesho-a teithehpa-a bailai touyu sü paosü peiwe,
ae khei teimai teizhiyu haina nou dosho-a khei sü velai touyu hai paosü peiwe.
3Paila moyuma chipao lako aliro paomoe,
hakho ali-a choumoe;
4ana puletao vei chipao hai deiphao teitei seita loua baiwe,
ae deiphao kainghou adai veishi hi chouve khailou baiwe.
Ramai nou ratei hinou teinghiye donou ki ali soupei khaitoue.
5Sübüa puhnou shinghi laiyu mai ali büa shona hai tapawe,
ae tuvayu mai ali nou tuvei shopoa tuyu büa pawe.
6Puhnou ratei alilo vanou paloua tasühao poa
alilo vahi kou loutawe.
Hataralia puhvei souyu na hisü nou tutsü louhoe.
Mapao vei Chikha
7 Mapao vei chikha hai chekho baie,
haina nou rakoye sü souchü soukhou peie.
Mapao vei kharochi hai louche louveie,
haina nou tsüdo hayu maiye sü tsüdo aveih peiwe.
8 Mapao vei chikhatao hai kao-e
ae sütao zü louyu mai hai savawe.
Mapao vei kharochitao hai cheche-e,
ae sütao nou maikhe maiye sükulou süyu tsüdo aveih nasü peiwe.
9 Mapao ye tsükhoulo, puh hai veisho-e;
puh hai akhai ha-a nou sübüa bukoute-a bailai.
Mapao nou chiku peiyu hai kao-a baiwe,
puhnou chiku peiyu hai teisa nou cheche hisünou kupeia baiwe.
10Sütao hai sana jünou jüpapulo,
sütao hai laivoudzü veikayu tyajünou jüpu hie.
11Sütao nou nevei kilai Eye tsüdo peiwe,
sütao zü louyu donou Eye buu peie.
12Mai ali-a lah vei mah nasü ngaolou moe;
Oh Mapaowo, Eye ngaomoyu mahmotao hinou khailupa peio.
13Pfüphao nou sounüa souyu mahtao hinou-a Eye povai porei peio,
sütaoye panou Eye khasa-a bupeiso.
Sükulouzü E hai lichekho-a bailai,
ae mahmo ashi hinou E hai shee-a bailai.
14Avei chipao lako ae Enou tsücho-a buyu khesü nenou popeio,
Oh Mapaowo, avei baibu ae Eye khailupa apeio.
Currently Selected:
LOUTAO 19: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
