LOUTAO 18
18
David vei Veilouyu Lou
(2 Sam 22.1-51)
1Oh Mapaowo, Enou neye leshie!
Ne hai Eye vupa apeio nasüe.
2 Mapao hai avei chuhdu ae reihkhaobu nasüe.
Avei Ramai nou Eye kho peiwe,
ae puh hinou Esü bailouwe.
Puh hai avei rü-e ae Eye vupeia panou kaozhou veia bubaiwe.
3Enou Mapao ye kuyu phaki,
Eye ngaobayu maitao bah hinou puhnou Eye khailupa peie.
Mapao ye paosholo!
4Kaozhou shi-a thailou veiyu sünou Eye sühao loure,
ae soukanghei peiyu sünou dzüdu büa ahisü veloure.
5Kaozhou ashi ae athai sünou Eye sühao loure,
ae khü hi loure vei sho-rü sünou Eye sühaokhai loure.
6Enou veaho-a buyu phaki, Mapao ye sü Enou ku-e;
Enou avei Ramai hi Eye soukha peio tea kho-e.
Puh vei rathoki hinou avei pai sü puhnou süloure;
soukha peio tea Enou kra-a paoyu sü puhnou kei peie.
7Süthaisü deiphao hai ngua nou lüre,
deichi vei beimaa hai lüa ngure,
daiolouzü Ramai nou lekha loure,
8Puhvei nghou qulu hinou meikhao sü khaopare,
ae puhvei mü hinou meikei ae meithou sü keipare.
9Puhnou ratei sü soukho khaiwure
ae puh phi khevai sü zhitei touyu teihao nou koulou loure.
10Puhnou shouh pfüyu khaona phao hinou tavei shopoa nou zhaotawe,
puhnou teikhai vei shouh hinou zhaopoa tawe.
11Puhnou lah puhye sü azhi nou holoure,
puhye sü teihao ae dzü nou sühao poa nou bue.
12Puh nghoujü hinou buyu teirei vavayu hisünou payu reithou ae mei ava nou zhitei-a buyu teihao khesü souha laire.
13Süthaisü Mapao nou ratei hisü nou pa teisü pare,
ae Kukulai hi Bupu pai sü panou choue.
14Puhvei voulouthou sünou kapa puhye ngaobayu maitaoye sü soupho rarou laiwure,
teipei vavayu nasü nou pa puhnou puletaoye sü tutare.
15Oh Mapaowo, nenou neye ngaobayu maitaoye züpeiyu phaki,
ae nevei lekha rarou sünou puletao hi rayu phaki,
zaidu dzü nou hopfüa buyu dei sü zhingaoe,
ae deiphao vei beikhei sü halinou-a hokhai more.
16 Mapao nou ratei hinou takou Eye poloue,
ae Eye puhnou zai thoushoyu buh hinou popa peie.
17Puhnou Eye ngaoba shoa buyu maitao,
ae Eye ngaora shoa buyu maitao bah hinou vupa peie,
daiolouzü puletao hai Eye donou khousho loure.
18E veahoa buyu teile hinou puletao nou Eye due,
ana Mapao nou Eye vupa peie.
19E kaozhou shia buyu phaki puhnou Eye soukha peie;
puhnou Eye khailupa peie, daiolouzü puhnou Eye jüpa-e.
20 Mapao nou Eye kaozü thaifüa buu peie,
Enou chilee checheyu thaifüa puhnou Eye shiha peie.
21Enou Mapao vei chikha sü züwe,
ae Enou Ramai hisü nou tarei tamoe.
22Puhvei chikha veishi sü Enou züloure,
ae puhvei kharochi khesü Enou züba moe.
23E mah ali-a hai-e touyu puhnou süwe,
ae kaomoyu vah haso aliro Enou soumoe.
24Südonou Mapao nou Eye kaozü soua hrüyu donou ae chilee cheheyu donou shiha peie.
25Oh Mapaowo, nenou chilee checheyu mai hisü chilee cheche peie;
mai aveih mai hisü nenou mai veisho peie.
26Sheeyu mai hisü nenou sheesha-a ngaopeie,
ana mai ashimai hisü nevei zhaipou ashi nasü soungao peie.
27Nenou tainou soua laiyu maiye sü khailupa peie,
ana khaophu souyu maiye sü ponakou peie.
28Oh Mapaowo, nenou avei meivabvü nasü taopeie;
ahi zhi-a buyu nasü nenou souva peie.
29Eye ngaobayu maitaoye duloure khouko sü nenou ahi peie,
ae puletao nou kivo khokhai touyu khesü zhaocho lousüyu khouko sü ahi peie.
30Ramai vei vah haso hai veichekho toua baie!
Mapao vei chipao hai cheche-e!
Puhye louche-a phouyu mai hrülai hisü puhnou rü ali büa vupeiwe.
31 Mapao likhei Ramai sü baie,
Etaoye vupeire hai Ramai baimoa kukhe mai thao bue?
32Ramai nou Eye soukhou soutsü peie,
ae avei ludu veishi sü kaozhou veia panou taloue.
33Puhnou Eye shu büa tavei shoyu phi soupei khaitoue,
ae deichitao hia Eye panou kaozhou veia buloue.
34Puhnou Eye soureih soure do khesü doupeie,
sübüa Eye panou chikayu voulou koute-a poa kalou süyu sü soupeie.
35Oh Mapaowo, nenou Eye vupeie ae khailupa peie,
nevei leshi zhuvea vanou Esü duso-a baie,
ae nevei khouko vanou Esü kaozhou veia baie.
36Ngaoba maivei bah hi loure hinou nenou Eye poku povai peie,
ae Eye panou kaodu takhai toumoe.
37Eye ngaobayu maitaoye panou thaihu poho puletaoye nüloue,
puletaoye souha khaimo koute panou souha loue.
38Enou puletaoye dakhao peie, ae puletao hai kushupu laimoe,
puletao hai anghoujü nou hraongu ngaore.
39Nenou Eye soureih soulou süyu khouko sü peie,
ae Eye ngaobayu maitao jünou ngalouyu peie.
40Eye ngaobayu maitao hai nenou pa ahinou tutare,
Eye ngaorayu maitaoye sü Enou souha peiwure.
41Soukha peio tea puletao nou kra-a khowe,
ana puletaoye sü maili noua vupa peimore;
puletao nou Mapao ye ku-e,
ana puhnou puletao vei khoyu nasü keipei more.
42Enou puletaoye sü naihü büa sousasa khaipeiwua puletaoye sü panou teikhai nou hüpoa tare.
Enou puletaoye sü ludu hi buyu nai büa deijüjü peie.
43Eye ngaophou moa khaityayu maitao hisü nou nenou Eye khailupa peie,
ae Eye panou tyahrütao pei hinou pa peikhowo nasü soupeie.
Enou sümo ngaomoyu maitaoye panou chuo avei kuvah souyu mai soure.
44Vakou mainou chuo Eye khurüa bure,
Enou kharochi peiyu phaki, puletao nou achi sü züre.
45Shetu maitao hai khuveiyu sü hare,
ae puletao nou veihsho-a soukhai touyu reihkhaobu kinou ngaopi shopoa vakou tupare.
46 Mapao hai hriwe! Eye vupa-apeio ye sü paosholo!
Eye khailupa peiyu Ramai vei aduso nasü shapao peikhaio.
47Eye ngaobayu maitao jünou veilouyu nasü puhnou Eye peie,
tyahrütaoye sü avei khakhe hi polou khaipeie.
48ae Eye ngaoba-a buyu maitao hinou Eye khailupa peie.
Oh Mapaowo, nenou Eye ngaobayu maitao jünou veilouyu nasü peie,
ae zhaipou ashi maitao hinou Eye vupa peie.
49Südonou Enou neye tyahrütao nghoujünou paoshowe;
Enou neye lou soushowe.
50Ramai nou puhvei veo hisü dusho-a veilouyu nasü peie;
puhnou dokupa louyu mai hisü tobai soumoa leshiyu nasü ngaopeie,
David ae puhvei tyaosholea hrülai hisü akhai hayu zhuvea leshi nasü peie.
Currently Selected:
LOUTAO 18: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
