LOUTAO 17
17
Mahlia Hayu Mainou Paoyu Veachi
1Oh Mapaowo, Enou kaozü na
thaipfü soupeio tea khoyu nasü keipeio,
Enou kra–a soukha peio tea paoyu sü lenoua keipeio!
Ale sheesha teanou veachi paoyu sü kei peio.
2Enou jüpayu hinou avei chi sü nenou keipeilai,
daiolouzü kaozü nasü nenou süwe.
3Nenou avei tsüle sü süwe.
Nenou ahi sü khei nou ve-e;
nenou Eye kabüa busa touyu veishi sü zhuwe,
ae hashi ali-a ahinou bua nenou ngaolou moe.
4Mai kukhemai büa Enou chila shi sü raomoe;
Enou nevei chikha sü züloure,
ae ashi mainou tayu ludu nasü thaowure.
5Teisa nou nevei ludu hisü Enou ta-a baiwe,
ae teithe lia Enou sühinou tarei tavai tamoe.
6Enou ne hisü veachi paowe, Oh Ramai;
daiolouzü nenou avei veachi sü kei peie;
südonou ahilo reiloua Enou paoyu avei chipao khesü kei peio.
7Nevei khupa leshiyu nasü paongao peikhaio ae Eye khailupa peio;
ne hinou bailouyu thaio, Eye ngaobayu maitao nghoujü nou E hai kaozhou vei bailai.
8Soutaosoua Eye zhutoua kho peio,
nevei shouh khe hinou Eye poku peio,
9Eye soushilai tea buyu maishi maitao hinou.
Eye ngaobayu maitao nou sühao poa buloure;
10puletao hisü zhuveayu aliro ha-e ae khaophu sousho-a chi pao-a bure.
11Chuo puletao hai Enou tayu buh liki hisü veloua Eye soukhaore donou da-a buloure.
12Puletao hai khaosouveo büa Eye da-a buloure,
Eye peide sasa khaire donou da-a buloure.
13Oh Mapaowo, tave Eye dua buyu avei ngaoba maitaoye souka ngheipeio!
Eye mai ashimai bah hinou nevei khoche nou poloua khailupa peio.
14Deiphao hai hinou jüpa ngaochekho-a buyu maitao hinou Eye khailupa peio.
Nenou puletaoye souveare donou khaida khaitouyu nanou poa puletaoye tudee peio;
puletao vei nahmaitao hi khayu jünou la-a nou souveapu peio,
ae puletao vei nahmai tyaomaitaoye donoua khaida peio!
15Ana Ewo louzü neye ngaolai,
daiolouzü Enou kaomo zümo vah ashi ali-a soumoe;
ae Enou kaishuyu phaki, ne nghoujü nou sava-a nou neye rai-a bulai.
Currently Selected:
LOUTAO 17: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
