LOUTAO 148
148
Deiphaomai Hrülai Ramai ye Paosholo tea Kuyu
1 Mapao ye paosholo!
Raki vanou Mapao ye paosholo,
kuyu buh hinou hrüa buyutao puhye paosholo.
2Rakivamai hrülai, puhye paosholo,
puhvei reihmai hrülai, puhye paosholo.
3Khouh teinghei, puhye paosholo;
puhye paosholo, tei hinou va-a buyu vuhtao.
4Kukayu hi buyu rateitao, puhye paosholo,
ratei pei hinou buyu dzütao, puhye paosholo.
5Puletao hrülaiye sü panou Mapao vei zhih sü paosho khaio!
Puhnou kharochi peikhaie,
sütao hai souloua baie;
6puhvei kharochi thaifüa puletao hai lahkuku nou bure buh hisü teisa nou buloue,
ae puletao nou puhvei chi sü züba moe.
7Deiphao sü panou Mapao ye paosholo,
dzü hi buyu maitouyu khaotao ae zaidu hi buyu hrülai,
8tei peivavayu na ae reithoutao, vüra ae teihaotao,
ae teikhai chishoyu khesü puhvei kharochi sü züe.
9Puhye paosholo, deichi ae deitaoh veishi,
rashibetao ae vaobvütao;
10kikhaorü ae rekounou buyu hrikhaona hrülai,
pounou roupoa tayu khaonatao ae tei hi raohou veishi, puhye paosholo.
11Puhye paosholo, veo maitao ae mai hrülai,
veo nahpoututao ae süthai-apei mai hrülai;
12kheloumai, nahle maitao, tsümaitao ae nahmaitou hrülai nou puhye paosholo.
13Puletao mai hrülaiye panou Mapao vei zhih sü paosho khaio!
Hakukhe veishi jünou puhvei zhih hai dupu hie,
puhvei kathe hai deiphao ae raki jünou kupu hie.
14Puhnou puhvei maitaoye soukhouchi peie,
südonou puhvei mai hrülai, puhye paosholo.
Israel maitao hai puhnou leshi shoe.
Mapao ye paosholo!
Currently Selected:
LOUTAO 148: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
