LOUTAO 147
147
Khoukhoulai Ramai ye Paoshoyu
1 Mapao ye paosholo!
Etao Ramai ye lou soushoyu hai veisho-e;
puhye paoshoyu hai vashoe, südonou puhye paosho züe.
2 Mapao nou Jerusalem sü soushupu peie,
ae puhnou vakou nüpoa tayu maitaoye sa-a dakhai vepeie.
3Puhnou tsüle pepoa buyu maitaoye sü souvei peie,
ae zhizhu khaitoua buyu maitaoye sü kiko peie.
4Puhnou teihi vuh khesü panou haizhou bulai touyu sü soupeie,
ae alili nou zhih kupeie.
5Dushoyu ae khouko bushoyu hai Etao Mapao-e,
puhvei tsüsü hai Etao nou süvete louhoe.
6Puhnou tainou soua laiyu maiye souduso peie,
ana mai ashi maiye deiphi hi sounakou khai peie.
7 Mapao ye lou nou sousho khaio;
Etao Ramai ye poa lou souyu baseina noupu paila aveih nou sousho peikhaio.
8Puhnou ratei hi teihao khesü poa khaipeie;
puhnou deiphao hi teirü kou peie ae poudai khesü puhnou deichi hinou pa paopa peie.
9Puhnou hrikhaona khesü touso peie,
ae ra-a buyu tei hi lüche tao-a touso peie.
10Puhnou asayu hai khoushoyu rheitao donou moe,
moa khuvei shoyu reihmaitao donou moe;
11ana puhnou savayu hai puhye tsükhoua buyu maitaoye donoue,
ae puhvei tobai soumoa leshiyu nahai louche-a buyu maitaoye donoue.
12Oh Jerusalem, Mapao ye paosholo!
Oh Zion, Ramai ye paosholo!
13Puhnou nevei rokhubomü khesü soukhou peilai;
puhnou nevei maitaoye sü ha peilai.
14Puhnou nevei deirai hisü kaonayu hai peilai,
ae puhnou neye sü thoudzü veishoa nou peilai.
15Puhnou deiphao hisü kharochi peie,
ae puhnou paoyu nasü thashoa nou soupeie.
16Puhnou vü nou sahba ali büa khukhai peie,
ae vüra khesü naihü büa soupho rarou peie.
17Puhnou reithou hai chuh ali büa seikou peie,
puhnou kaosho-a nou seive peiyu sütao hisü mai lia lalou hoe!
18Süthaisü puhnou kharaochi peikhai-e,
vüke khesü dzü vita-a baiwe;
puhnou teikhai seive peikhai-e, dzü hai küta-a baiwe.
19Puhnou chipao hai puhvei maitao hi peie,
puhvei paodou peitao ae chikhatao hai Israel mai hi peie.
20Puhnou haibüyu hai tyahrü kukhe hi soupei moe;
puletao hai puhvei chikha khesü sümoe.
Mapao ye paosholo!
Currently Selected:
LOUTAO 147: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
