LOUTAO 145
145
Paoshoyu Lou
1Oh avei Ramai ae veo, Enou nevei duso nasü paosholai.
Enou neye teisa nou kalo paolai.
2Teithechü Enou neye kalo paopeilai,
Enou neye teisa nou paosholai,
3 Mapao hai dushoe ae puhye soutaosoua paosho züe,
puhvei aduso nasü Etao nou süvete louhoe.
4Nenou soukhai touyu vah haso khesü khaphao ali hinou khaphao ali hi paosho poa koulai;
puletao nou nevei khupayu vah khesü shapaolai.
5Puletao nou nevei kathe ae khouko sü paolai,
ae Enou nevei khupayu vah haso khesü licho-a bulai.
6Maikhe mainou nevei khupayu vah haso khesü paolai,
ae Enou nevei aduso nasü shapao peilai.
7Puletao nou nevei aveih teitei sü paolai ae nevei zhuvea leshiyu nasü lou nou sousholai.
8 Mapao hai zhuvea leshi sühsho-e,
lekha haha moe ae tobai soumoa leshi peiyu nasü phoutao-a bua baiwe.
9Puh hai mai hrülai hi veishoa baiwe,
ae puhnou soupeikhai touyu na veishi hi zhuvea leshi peiyu nasü bue.
10Oh Mapaowo, nenou soupeikhai touyu bashana teitei nou neye sü paosholai,
ae nevei maitao nou neye kalo paolai.
11Puletao nou nevei vedei vei kathe nasü paolai,
ae nevei khouko sü mai hi paongaolai,
12sübüa mai hrülai nou nevei vah haso khesü süloulai,
ae nevei vedei vei kathe nasü süloulai.
13Nevei vedei hai teisa vei vedei soulai,
ae nenou akhai ha-a teisa nou veo sü soulai.
Mapao nou paokhai touyu chipao teitei hai cheche-a vete-a bailai,
ae puhnou soupfüyu veishi hai zhuvea leshi hinou soupeia baie.
14Veaho-a laiyu maiye puhnou soukha peie,
kaodu tayu maiye sü puhnou phaola phaoshu peie.
15Hriyu na hrülai vei areih nasü ne baie,
ae nenou puletaoye sü touso hai peie.
16Nenou puletaoye sü rukhalou sü peie ae puletao nou jüpayu veishi sü peie.
17 Mapao nou souyu vah teitei hai kaozü hinou soupeia baie,
ae puhnou leshi hinou vah haso veishi hai soupeie.
18Puhye kua buyu maitao hisü puhnou nghiteia bupeie,
puhye cheche-a nou phouyu mai hisü nghiteia bupeie.
19Puhye tsükhoua buyu maitaoye sü puhnou puletao vei jüpa na khesü peie;
puletao nou krayu paisü puhnou chouloua puletaoye khailupa peie.
20Puhye leshi-a buyu mai hrülaiye sü puhnou kho peie,
ana puhnou mai ashi maiye sü souha-a bailai.
21Enou Mapao ye sü teisa nou paosholai,
puhvei sheeyu zhih nasü panou hrikhaona hrülaiye paosholo.
Currently Selected:
LOUTAO 145: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
