LOUTAO 144
144
Veo nou Veilouyu donou Ramai hi Kalo Paoyu
1Eye vupa-apeio Mapao ye sü paosholo!
Puhnou Eye kabüa soureih soulai touyu dokai khesü doupeie.
2Puh hai Eye kho-apeio chuhdu nasüe,
alia avei baibu ae Eye khailupa peipue,
puhnou Eye pa kaozhou ashi daokhailai moe touyu Enou puhye louchewe.
Puhnou tyahrütao hai avei khakhe hi pothou peie.
3Oh Mapaowo, nenou süngao-a buyu Emaitou hai daige?
Thai-a bailaiyu hazhoti lia moyu maiye donou ne daitea tsü chowe?
4Puh hai teikhai hüphou tayu büa baie;
puhnou bure teile hai teihao ali büa ta-a baiwe.
5Oh Mapaowo, ratei sü paipha loua takou peikhaio,
deichi khesü kou deipei khaio,
sükulouzü sütao hai meikhao pa-a bailai.
6Tei peivavayu nasü seive peio,
sükulouzü neye ngaobayu maitao hai tupo rarou ta-a bailai.
7Kushoyu buh hinou ne bah thaikou Eye zai thoushoyu hinou paipa peio ae khailupa peio,
Eye vakou maivei khouko hinou khailupa peio,
8puletao hai acheche chi paokhai toumoe,
ae chaachou soukhai touyuma dakhokho-a baiwe.
9Oh Ramai, Ewo neye lou ashu nou sousholai;
Enou shapoulei ae lanabvü poa neye lou sousholai.
10Nenou veo maitaoye soureih veilouyu sü peie,
ae nevei kilai David ye vupa peie.
11Zhaipou shishoyu ngaoba maitao hinou Eye khailupa peio,
vakou mai bah hinou Eye vupa peio,
puletao hai checheyu chi paokhai timoe,
ae chaachou soukhai touyuma da-a baiwe.
12Etao vei nahpoutu maitao hai nahle-a buyu phaki,
panou khouchi sho-a buyu süübe ali büa bupeio.
Etao nahnaotu maitao hai veo vei ki hi zhainga
veihsho-a soukhai touyu deka ali büa panou maiye thainüa bupeio.
13Etao vei thoubao khesü panou thou tyatyali nou phoutao-a bupeio.
Etao vei teidei hi kikhaorü khesü panou tyakaa nou phoutao-a hrüyu sü soupeio.
14Etao vei kikhaorü khesü panou tyoutu touthayu sü soumoa alaolao toupeiyu sü soupeio.
Etao vei teidei hisü panou veaho-a choroyu sü soupeiso.
15Haibüa ha ngaoyu mai hai savayu maitao-e;
Mapao ye panou puletao vei Ramai soulouyu maitao hai savayu maitao-e.
Currently Selected:
LOUTAO 144: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
