LOUTAO 140
140
Vupa Peire donou Veachi Paoyu
1Oh Mapaowo, Eye mai ashi maitao hinou khailupa peio,
Eye zhaipou shiyu maitao hinou vupa peio.
2Puletao hai teisa nou shodo ashi soua bu baie,
ae züveire donou souda-a bukoute-a baiwe.
3Puletao vei mali hai nghou tushitya raibüe,
ae puletao vei chipao hai tushi shoyu nghouvu raibüe.
4Oh Mapaowo, mai ashi maitao bah hinou Eye vupa peio,
zhaipou shishoa Eye soushilai tea buyu maitao hinou Eye kiko peio.
5Khaophu souyu maitao nou Eye muloulai tea rüh southou khaipeiwe,
ae Eye beloulai tea puletao nou khahbe sü avei ludu hi khikhai toue.
6Enou Mapao hi paoe, “Ne hai avei Ramai-e.”
Enou kra-a soukha khoyu avei pai keipeio, Mapao.
7Oh Mapaowo, Khoukhoulai avei Mapao, Eye vupa-apeio,
nenou Eye reih souyu reihbu hinou vupa peie.
8 Mapao, mai ashi maitao nou jüpa-a buyu khesü panou ngaolouso,
puletao nou shodo ashi souyu khesü panou vete louso.
9Eye ngaobayu maitaoye panou veilouso;
puletao nou Eye soupi-a buyu khesü panou puletao hi dakhai koupeio.
10Soushoyu meithou nou puletao hi lakou peio;
puletaoye sü deibvü hi panou delou loua dakhai papuso.
11Dahrührüa maiye poshiyu maiye sü panou veilouyu ngaoso;
zhaipou shiyu maiye sü panou ashi hinou veiloua puletaoye sü souha peio.
12Oh Mapaowo, nenou touha laiyu maiye vupeiwe,
ae veahoa laiyu maivei zü nasü zhu peiwe touyu Enou süe.
13Checheyu maitao nou neye sü paosholai,
ae puletao nou nevei nghoujü hinou bulai.
Currently Selected:
LOUTAO 140: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
