LOUTAO 139
139
Süchekhoyu Ramai
1Oh Mapaowo, nenou Eye phou-e ae Eye süloure.
2Enou souyu vah veishi nenou sükhaiwe;
doushoa buyuma nenou avei tsüle teitei sü sükhaiwe.
3Enou vah soua buho moa ngasoua busa nenou ngaowe;
avei vah haso veishi sü nenou süwe.
4Enou paipa mojünou,
dai chi paopa laisa touyu nasü nenou süwe.
5Nenou avei pehao teitei hi dai bue touyu sü süwe;
nenou nevei khouko sünou Eye vupa peie.
6Nenou süngaoyu hai Eye donou khupa zhuhle-e;
Enou haisü ha kilia süvete louhoe.
7Ne hinou tuvai paloua E taho buloure buh daiki nou bue?
Ne nghoujü hinou tutsü loure buh daikiniou bue?
8Enou raki hi kheyuma, ne sü sühinou bua bailai,
Enou athai maivei teidei hi hoyuma sühia ne sü bua bailai.
9Enou teinghei palova zhaola poho buyuma moa teinghei loulova jünou dou-a buyuma,
10buh sühia nenou Eye salai peilai,
ae buh sühia nenou Eye soukha peilai.
11Teizhiyu nasü panou Eye züholo,
moa apehao hi buyu ava nasü panou teimaiyu khei soupeio tea pao-a buyuma,
12azhi na koute-a ne hio zhi moe,
ae kheiki-a ne hiolouzü hea teivayu bütoua baie.
Ne hiolouzü teizhiyu ae teivayu hai raibütoua bubaie.
13Nenou avei vasou veishi sü soupeie,
nenou Eye apfü pou hinou sou peie.
14Neye sü ngaopiyu kao-e, südonou Enou neye paoshowe;
nenou soupfüyu vah haso teitei hai ngaokhupa khaibaie.
Sütao teitei hai Enou sükhai toue.
15Nenou soutaosoua avei rao khesü apfü vei pou khevai hinou southou tou peie.
Enou sühinou kheikhei soua duso payu phaki,
ae sühinou bue touyu sü nenou süe—
16E nakoumo jünou nenou Eye ngaore.
Eye panou teile kasho hrülai touyu khesü Eye souchemo jünou nevei larübvü hisü rüthou khaiwure.
17Oh Ramai, nenou tsüchoyu khesü Eye donou daizhou koute tatei sarou!
Sütao hai daizhou koute pou-a nou busa!
18Enou sütao hai phoulai toulouzü,
sütao hai rei hi vonai jünou pou-a bulai.
Enou kaishuyu phaki, Esü neye koa bue.
19Oh Ramai, nenou mai ashi maiye southa peiyu Enou jüpashoa nou bue!
Zhaipou shishoa buyu maitao nou Eye thao-a tare nasü E vuzhi shoa nou bue!
20Puletao nou neye sü ngaophou moa chi ashi nou pao nou bue;
puletao nou nevei zhih sü paoshia nou bue.
21Oh Mapaowo, neye ngaorayu maitao hai E-a puletaoye ngaora-e!
Neye khaitya duyu maitao hai Enou puletaoye ngaonü moe!
22Enou puletaoye sü cheche vuzünou ngaora shore,
Enou puletaoye sü Eye ngaobayu maitao-e tea powe.
23Oh Ramai, Eye soutaosoua nou poa zhupeio, ae avei tsüle sü süpeio;
Eye kabü laisa tea zhupeio, ae Enou tsüchoyu veishi sü süpeio.
24Ahi hakinou tsü ashi bulouzü popa peio,
ae Eye teisa nou bure ludu hisü süthaisa-a tapeio.
Currently Selected:
LOUTAO 139: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
