LOUTAO 109
109
Mai alinou Veahoyu donou Ramai hi Paoyu
1Oh Ramai, Enou neye
paosholai; ne ngasou zei tea bupeiso!
2Mai ashi mai ae dayu maitao nou Eye sü duloure.
Puletao nou Eye sü dahrührüa nou paopeire,
3ae puletao hai kaokhai moa Eye paoshi peie,
ae zülia ha-a nou Eye sü dure.
4Enou puletaoye leshi peiyu thaosü puletao nou Eye mah paodu peie,
ana Enou puletaoye donou veachi paopeie.#109.4 Haina nou kaoyu phae puletaoye donou veachi paopeie; Hebrew hi sheesha moe.
5Enou vah aveih soupeikhai touyu nasü puletao nou Eye vah ashi sünou paoh khapeie,
ae Enou leshi peiyu thaosü puletao nou Eye ngaora peie.
6Puh pei hi chikure donou chiku peiyu mai ashi aliye dothou peio,
ae puhye sü panou puhye ngaobayu mai aliye panou mah paodu peio.
7Puh pei hi chikuyu phaki puhvei mah khesü panou ngaolo;
puhnou veachi paoyu hai-a panou kaomoe tea sülo.
8Puhye sü panou hrü shoso;
mai kukhe mai aliye panou puhvei vahbu nasü polo!
9Puhvei nahmaitaoye sü panou rounahtou soutawo,
ae puh chapfüye sü panou mimea maipfü southeo.
10Puhvei nahmaitaoye sü panou ki ha-a nou tosüyu mai souta peio;
puletaoye sü puletao nou buyu buh hinou hulai peio.
11Paozho pfüyu maitaoye panou puhvei buyu na veishi sü potakhai peio,
ae shetumaiye panou puhnou soupfü khaitouyu khesü polouyu sü soupeio.
12Puhye sü panou mai taralinoua zhuvea peiso,
moyuma puhnou thaodai khaitouyu rounahtou taoye sü panou mai linoua kiko peiyu sü soupeiso.
13Puhvei tyaosholea hrülaiye sü panou mai ali-a hria bupeiso,
ae puhvei zhih sü panou khaphao ahai chena hiolouzü lichopu khaiso.
14Puhvei puopaoh maitao nou vah ashi soukhaitouyu khesü Mapao ye panou licho peiyu soulo,
ae puh pfü nou mah soukhai touyu khesü panou khaipei khaitouso.
15 Mapao ye panou puletao vei mahmo khesü teisa nou licho peiyu sü soupeio,
ana puletaoye sü panou teisa nou ngaiyu sü soupeio!
16Mai sünanou leshi zhuveayu nasü licholou more,
ana touhayu mai, veaho-a laiyu maitao ae le pepoa nou dopfüa laiyu maiye sü souvea souchoro peia nou southa peiwure.
17Puhnou maiye chaa peiyu nasü jüpa-e,
puhye panou chaa nasü ngaotheo!
Puhnou maiye ha peiyu nasü ngaora-e,
mai lia panou puhye sü shiha peiso!
18Puhnou maiye chaayu hai sabanü banouyu büa teisa nou banoupoa lai-a baiwe;
puhvei chaa nasü puh pfüphao hi dzü chayu büa chatheo,
ae rao hi theadzü nakhai touyu büa nakhai peio.
19Sütaoye sü panou puhye sah nou hopüa buyu büa ae khyakho nou khopüa buyu büa bupeio.
20Oh Mapaowo, Eye ngaobayu maitao ae Eye paoshi-a laiyu maitaoye sü sübüa soupeio!
21Ana Oh Mapaowo, avei Mapao, nenou paohkhai touyu thaifüa Eye soukha peio,
ae nevei tobai soumoa leshi peiyu nevei aveih sünanou Eye khailupa peio.
22E hai touha-a nou veahoa laiyu mai ali baie;
avei tsüle hi loute hai zhishih shoa nou khaipeiwure.
23Koukhe teihao büa Ewo thashoa nou hata laire,
Eye khaonatou ali büa teikhai nou hüpoa tare.
24Ewo hatou moa khü pouleyu donou lülou hore;
avei pfüphao hai kirürüa nou rao ae hee likhei bua baire.
25Eye mainou ngaolouyu phaki, puletao nou Eye sü konü peie,
puletao nou pei züpoa nou Eye sü dua baire.
26Oh Mapaowo, avei Ramai, Eye soukha peio;
nevei tobai soumoa leshi peiyu sü nanou Eye khailupa peio.
27Eye ngaobayu maitaoye panou nenou Eye sü khailupa peiwe touyu nasü pa sülou khaio.
28Puletaoye panou Eye sü chaa peio,
daiolouzü nenou Eye shiha peia bailai.
Eye souvea souchoro peiyu maiye panou hraongu ngaoyu soupeio,
ae nevei kilai Eye panou asalo!
29Eye ngaobayu maitaoye panou hraongu sünou sahba soua balo,
ae hao ngaoyu sünou puletao vei sabanü büa panou banoulo!
30Enou shura soua nou Mapao kalo sü paolai;
maisou vejüa buyu hrohinou Enou puhye sü paosholai,
31daiolouzü puhnou veahoa laiyu maiye sü vupeiwe
ae puletaoye soushi souhalai tea buyu maitao bah hinou khailupa peie.
Currently Selected:
LOUTAO 109: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
