LOUTAO 108
108
Ngaobamai Bah Hinou Vupa Peio tea Veachi Paoyu
(Lou 57.7-11; 60.5-12)
1Oh Ramai, avei tsüle veishi nou peia neye louchewe!
Enou lou soulai ae neye paosholai!
Arako, tashulo!
2Poa lou souyu avei basei natao, tashulo!
Enou teingheiye sü kaishu peilai.
3Oh Mapaowo, Enou neye sü tyahrütao hinou kalo paopeilai,
Enou maikhe mai hrohinou neye sü paosholai.
4Daiolouzü nevei tobai soumoa leshiyu na hai raki hi khetere;
nevei chilee checheyu nasü ratei hi khe daire.
5Oh Ramai, nevei aduso nasü ratei hinou pongao peikhaio,
nevei khouko ava nasü deiphao hi ngaopei khaio.
6Nevei khouko sünou Etaoye khailupa peio, Enou veachi paoyu sü kei peio,
sübüa nenou leshi-a buyu maitaoye sü panou turei palou.
7Ramai nou puhvei sheeyu buh hinou haibüa paoe,
“Veilouyu hisünou Enou Shekem nuhdu nasü delaiwulai,
ae Sukkoth Deikho nasü Enou avei maitao hi zhipeilai.
8Gilead hai avei baie, ae Manasseh haina-a avei baie,
Ephraim hai avei peirüe ae Judah hai avei süüpo-e.
9Moab hai Enou poa dzükhüyu reikhao nasüe,
Edom hai avei baie touyu shee soungaore donou avei phi kha khailai,
Philistin teidei hinou Enou veilou ngalouyu nasü shapaolai.”
10Oh Ramai, thaonou Eye veisho-a soukhai touyu nuhdu hisü save peilai?
Thaonou Eye Edom hi sapoa vepei laige?
11Nenou Etaoye sü malai chekhao rewu?
Ne Etao vei soureih souyu maitaoye koa tapu peilai modou?
12Ngaobayu maitaoye duloure donou Etaoye soukha peio,
daiolouzü deiphao maivei soukha-apei haiolouzü hamako baie.
13Ramai nou Etaoye kozho peiyu thaio Etao nou kolou süe,
puhnou Etaoye ngaoba-a buyu maitaoye sü soukanghei peilai.
Currently Selected:
LOUTAO 108: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
