LOUTAO 107
107
LARÜBVÜ ANGOUNA
(Lou 107—150)
Ramai vei Aveih naye Paoshoyu
1“Mapao ye kalo paokhaio,
daiolouzü puh hai veisho-e
puhvei leshi zhuvea hai akhai hae!”
2 Mapao nou khailupa peiyu maitaoye sü panou haibüa paosholo.
Puhnou neletaoye sü ngaobayu maitao bah hinou vupapei khaitoue,
3ae neletaoye sü vakou maivei teidei,
teinghei palo ae teinghei loulova nou,
alia reilo ae khelo vanou sapoa dakhai vepei khaitoue.
4Kamai sü nuhdu hi vere ludu ngaoloumoa radeiki hinou sühao poa laire.
5Puletao hai houzü shoa nou bure,
ae areih aliro hazei toure.
6Süthaisü puletao nou veahoa buyu hinou Mapao ye sü kue,
ae puhnou puletaoye veahoa buyu hinou khailupa peie.
7Puhnou puletaoye ludu zütou touyu hinou
puletao nou hrüre nuhdu hisü süthaisa-a velou peie.
8 Mapao nou puletaoye leshi peiyu donou puletao hai puh kalo paozüe,
daiolouzü puhnou puletaoye donou khupayu vah haso alao soupeie.
9Puhnou dzü rei-a laiyu maiye sü rukha soupeie,
ae houzüa laiyu maiye sü touso veihlinou soupou phoupeie.
10Kamaia levea nou azhi hinou hukhamai soua veasho-a nou bue,
11daiolouzü puletao nou Khoukhoulai Ramai vei chikha khesü zübare ae puhnou paodou peiyu khesü laiwu laire.
12Puletao hai vah khoushoa soupfüyu donou shaloure,
puletao hai kaodu talaire,
ae mai linoua puletaoye sü soukha peilai moe.
13Süthaisü puletao nou veaho shoa buyu hinou Mapao ye sü kue,
ae puhnou puletaoye sü veahoa buyu hinou khailupa peie.
14Puhnou puletaoye sü veaho-a azhi buh hinou popa peie,
ae puletaoye phupfüa buyu hurai khesü puhnou soudelai peie.
15 Mapao nou puletaoye zhuvea leshi peiyu donou puletao hai puh kalo paozüe,
daiolouzü puhnou puletaoye donou khupayu vah haso alao soumoa soupeie.
16Puhnou baosahu nou soukhai touyu kikhubomü khesü dakho peie,
ae hu nou khakhai touyu bokha khesü dahra peie.
17Kamai sü voyu donou puletao vei mahmo vanou sounou soua bue,
ae puletao nou vah ashi souyu donou veaho-a nou bue.
18Puletao hai touso ali-a jüpayu sü hare,
ae thaire teile sü nghitei-a nou bure.
19Süthaisü puletao nou veahoa buyu hinou Mapao ye sü kue,
ae puhnou puletaoye sü veahoa buyu hinou khailupa peie.
20Puhnou puhvei chipao nou seive puletaoye sü souvei peie,
ae khü hi loutare hinou puletaoye khailupa peie.
21 Mapao nou puletaoye leshi peiyu donou puletao hai puh kalo paozüe,
daiolouzü puhnou puletaoye donou khupayu vah haso alao soupeie.
22Puletao hai posheela peiyu noupu koa puh kalo paozüe,
ae asayu lou nou koa puhvei vah haso khesü paopeio.
23Kamai-o zaidu phao vanou dzüluki pfüa huha soua hrüwe.
24Puletao nou zaidu hi khupayu vah haso khesü Mapao nou soulousüe touyu ngao-e.
25Puhnou kharochi peikhaie,
zaidu hi dzü hai chishoyu teikhai nou hükhü paloua baiwe.
26Dzüluki khesü tei hi hüpoa kukhe ae zai thouyu hi hüpoa loupeie.
Haibüa kaozhou shishoa buyu phaki maikhe mai hai khuveiyu hazei baiwe;
27puletao hai zhaoh sozhiyu mai ali büa chaorara-a baiwe,
ae puletao hi soulou süyu dokai veishi hazei toua baie.
28Sübüa puletao nou veahoa tsü ha-a buyu phaki,
puletao nou Mapao ye kue,
ae puhnou puletaoye sü kaozhou shi-a veahoa buyu hinou khailupa peie.
29Puhnou teikhai teirü ashi nasü soukaona peie,
ae zaidu hi dzü khüpayu sü nasei tare.
30Zaidu hi dzü hai kaonaphi tayu phaki puletao hai lesa shore,
ae puhnou puletao nou venüyu buh hisü savete peie.
31 Mapao nou puletaoye zhuvea leshi peiyu donou puletao hai puh kalo sü paozüe,
daiolouzü puhnou puletaoye donou khupayu vah alao soupeie.
32Maisou vejüa buyu buh hinou puletao hai puhvei aduso nasü shapao peizüe,
ae süthai–apei maitao nou vejüa buyu buh hinou puhye kalo paopei züe.
33 Mapao nou reidzü khesü deithe soupeie,
ae dzüla khesü southekei khaipeie.
34Puhnou thoudzü veishoa buyu teidei khesü tai buyu teidei hi souda thoupeie,
daiolouzü teidei sühi hrüa buyu maitao hai maishiyu donou.
35Puhnou radeiki khesü dzübvü hi soudapa peie,
ae deithe khesü panou dzünghou dzüla payu buh soupeie.
36Puhnou houzüa laiyu maitaoye panou buh sühinou hrüyu soupeie,
ae puletao nou nuhdu khesü soushu loue.
37Puletao nou shinamara khesü daothou peie
ae darkha kipei khesü souloua veishoa nou chachiyu sü souloue.
38Puhnou puhvei maitaoye hapeie, ae puletao hai tou-dzü alao ngaoloue;
puhnou puletao vei kikhaorü khesü panou shita hatayu sü soupei moe.
39Ramai vei maitaoye zhaipou shiyu mainou haoungu soupeiyu phaki ae soutai sounou peiyu phaki,
40Puhnou puletaoye sü souvea souchoro peie,
ae puletaoye sü panou ludu phouha-a radeiki hinou sühao poa ta-e.
41Ana puhnou touha laiyu maiye puletao nou veahoa buyu hinou vupa peie,
ae puletao vei kihikha maiye sü panou zhaokhome büa tyaka peiyu sü soupeie.
42Acheche maitao nou haisü ngaoloua lesa-e,
ana mai ashi maiye sü panou zei tea bue.
43Tsüveiyu maiye sü panou hai khesü tsücholo;
puletaoye panou Mapao vei tobai soumoa leshi peiyu nasü sülo.
Currently Selected:
LOUTAO 107: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
