LOUTAO 106
106
Puhvei Maitao hi Mapao vei Aveih
1 Mapao ye paosholo!
Mapao hi kalo paokhaio, daiolouzü puh hai veishoe,
puhvei leshi hai akhai ha-e.
2Puhnou soupeikhai touyu vah haso khesü thaonou paovete lousüe?
Thaonou puhye lichekhou teanou paosho peilou süge?
3Puhvei chikha khesü züa laiyu maitao ae teisa nou kaozü nasü soua buyu maitao hai savayu maitaore.
4Oh Mapaowo, nenou nevei maitaoye soukha peiyu phaki E-a licho peio;
nenou nevei maitaoye khailupa peiyu phaki E-a panou sühisü loulo.
5Nenou dopaluyu nevei maitao nou duso payu nasü E-a panou ngaolo,
nevei tyahrü maitao nou sava-a buyu hisü ae puletao nou sava-a kathe soua buyu hisü E-a panou loulo.
6Etao puopaoh maitao büa Etao nou mahmo khesü soupfüwure,
Eletao nou vah ashi sü soure ae mai shi-a soure.
7Etao vei puopaoh maitao nou Ejipt hi buyu phaki,
nenou khupayu vah haso soupei khaitouyu khesü licho peimoe;
nenou puletao hi tobai soumoa zhuvea leshi peiyu nasü puletao nou ngaiwure;
ae puletao nou Khoukhoulai hi Abuo ye sü Zai Ho hinou khaitya pare.
8Ana puhnou paohkhai touyu thaifüa puhvei dushoyu khouko nasü soungaore donou puletaoye sü khailupa peie.
9Puhnou Zai Ho nasü kharochi peie,
ae sünasü panou the tare;
puhnou puhvei maitaoye sübüa dei the hinou süthaisa-a tachopa peie.
10Puletaoye ngaora-a buyu maitao hinou puhnou puletaoye sü khailupa peie,
puhnou puletaoye sü ngaobayu maitao bah hinou vupa peie.
11Ana puletaoye ngaobayu maitao sü pa dzü nou maothare,
puletao mai ali koute-a turei palou moe.
12Süthaisü puhnou paohpei khaitouyu nasü puhvei maitao nou louche loure,
ae puletao nou puhye lou soushoe.
13Ana puletao hai puhnou soupeikhai touyu vah haso khesü thaso-a nou ngaiwure,
ae puhnou paodou peiyu khesü khomoa lahdodo soutare.
14Puletao hai radeiki hinou pfüphao jüpa nasü sounüa Ramai hai kabü laisa tea puhye zhai zhue.
15Südonou puhnou puletao nou jüpa-a khoyu nasü peie,
ana puhnou puletao hi sounou ashi-a koa nou seive peie.
16Maikhe mainou radeiki hinou ta-a buyu teile hinou sheeyu Mapao vei kilai Moses ae Aaron ye sü ngaorai pare.
17Süthaisü dei nou kopaloua Dathan ye zhaoloure,
ae Abiram alia puhvei kihikha maiye paoloure;
18mei nou kou puletao thaifüyu maiye taoloure ae mai ashi maitaoye sü deithare.
19Puletao nou Sinai deichi hinou chode ali zhai hai sana nou souloua sünaye sü thotare;
20puletao nou Ramai vei khouko ava nasü pounghou touyu chode zhairai ali nou poa lealoure.
21Ejipt hinou khupayu vah haso duduli soupeipu,
puletaoye khailupa-apeio Ramai ye sü puletao nou ngaire.
22Puhnou daizhou koute khupayu vah tyatyali soupeie!
Zai Ho hinou daizhou koute khupayu vah haso khesü puhnou soupeie!
23Ramai nou puhvei maitaoye souha laire tea buyu phaki,
puhnou dopa louyu puhvei kilai, Moses nou Ramai nghoujü hinou laloure,
ae puhvei lekha rarou nou puletaoye souhalai tea buyu nasü ngichao loure.
24Süthaisü Ramai nou paohpei khaitouyu nasü puletao nou louche moa
puletao hai sava shoa nou buloure teidei nasü malaiwure.
25Puletao hai puletao vei sahpao hinou nolealea bue,
ae Mapao nou paoyu chi sü kei bare.
26Südonou puhnou puletaoye sü panou radeiki hinou thaita khai-a bailai tea chaachou soure,
27ae puletao vei tyaosholea maitaoye sü panou porarou ta-a vakou maivei teidei hinou pa thaita bailai tea puhnou lelawure.
28Süthaisü Peor tea kuyu teidei hinou,
Ramai vei maitao hai Baal rahye tho tare,
ae hrirai hayu rahtaoye posheelayu sou khesü toutare.
29Puletao nou soupfüyu vahtao donou Mapao vei lekha sü daipawure,
südonou puhnou puletao hisü sounou ashi sü seive thoupeie.
30Ana Phinehas nou lashuloua kaomoyu maitaoye sü tudee peie,
ae rahta nasü chaore.
31Hai khesü puhvei leli ae jüpayu nasüe tea nou vere teile teitei hia licholai.
32Meribah touyu dzüla buh hinou maikhe mainou Mapao vei lekha sü soupa peie,
ae puletao donou Moses hai veahoyu sü ngaoe.
33Puletao nou puhye sü souchoro peiyu donou puhnou tsücho loumoa chi ashi taoli hai pao hahare.
34Puletao hai Mapao nou kharochi peiyu nasü zümoa cheche moyu rahye thoyu maikhe maiye sü southa more,
35ana puletaoye koa shanghi souzho loure,
ae puletao nou tayu zhai nasü fütare.
36Ramai vei maitao hai bashara taoye tho tare,
ae süna vanou puletao hai kaodu tare.
37Kanaan teidei hinou puletao hai puletao vei nah naotu poutu khesü basharaye poa sheela peire.
38Puletao nou mahmo ali-a hayu nahmaitaoye
southayu donou teidei nasü souzhai khaire.
39Puletao nou soupfüyu vahtao donou puletao hai sheemore,
ae Ramai hinou chilee chechemo tare.
40Südonou Mapao hai puhvei maitao hi lekha loure,
ae puletaoye sü puhnou ngaora loure.
41Puhnou puletaoye sü Ramai sümoyu tyahrü maitao bah hi thaothou peiwure,
ae puletaoye sü puletao ngaobayu maitao nou khasa-a hrüe.
42Ngaobayu maitaoye panou puletaoye souvea souchoro peie,
ae puletao khe hinou pa veasho-a nou hrüe.
43 Mapao nou puletaoye sü vutaoli hai khailupa peie,
ana puletao hai puhye khaityayu nasü doloua baire,
ae mahmo khesü soutapu-a baire.
44Ana puletao nou krayu pai sü Mapao nou keinou peie,
ae puletao nou veahoyu nasü puhnou süpeie.
45Puhnou puletaoye donou vo soukhai touyu nasü licho peie,
ae puhvei zhuvea leshi hinou puhnou puletao hi lekha nasü khaita peie.
46Puhnou puletaoye souvea souchoro peiyu maitaoye panou
puletaoye sü zhuvea leshi peie.
47Oh Mapaowo, Etao Ramai, Etaoye khailupa peio,
ae Etaoye tyahrütao hinou sa-a dakhai ve peio;
sükulouzü Etao nou ne kalo sü paolai ae nevei sheeyu zhih sü paosholai.
48Israel maivei Ramai Mapao ye sü paosholo;
puhye chua ae teisa nou paosholo!
Mai hrülaiye sü “Amen!” tea panou paolo!
Mapao ye paosholo!
Currently Selected:
LOUTAO 106: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
